MPC-in Chakma huangtau chhanah Congress leh MNF party-te an puh

MPC party chuan, Chakmate'n Mizorama bu an khuar ngheh tial tial chhan te, ram leilung fate chanvo chuha an huangtau ngam chhante chu Congress party-in an vote bank atana an duh luat vang niin an tarlang a; MNF-te pawh Chakmate thlavâng hauhtu an nih thu an sawi.

Nimin khan MPC chuan thuchhuah siamin, Chakmate chu ram dang mi, dan loa Mizorama lut ru an nih thu an sawi a, "Congress party-in fa chuam anga enin duat taka an enkawl vang a ni tih Zoram mipui hriatah kan puang a ni," an ti.

MNF party pawh Chakmate thlavâng hauhtu an nia sawiin MPC chuan, "June 30, 1986-a India sorkar leh MNF-ten inremna thunthlung, Memorandum of Understanding an ziah khan Chakma District Council ṭhiahna tur leh Chakma foreigner-te hnawhchhuahna tur thute an rawn ziak tel ngei turah mipuiin kan lo ngaih laiin, beisei loh takin Chakmate duhsak leh vobik number pakhatnaa nghet taka awm turin MoU No.9-naah an rawn ziak kuau a nih kha," an ti.

MPC chuan, Chakmate vanga Mizote'n harsatna lian tak an tawh fo chhan chu Congress leh MNF party-te'n an enkawl suakbâk vanga an ngaih thu an sawi a; union territory hun lai aṭangin PC sorkarin Chakma foreigner Mizorama lut rute titawp tur leh Chakma Autonomous District Council ṭhiah chu ngaihmawh bera an neih ṭhin a nih thu leh, chu chu tun thlenga an thupui ber pakhat a la nih thu an sawi bawk.