Lirthei kaihhnawihah sum tam zawk chawi theihna tur dan hmang dawn ; Central-in min nawr nasat vang - Transport Secy

Mizoram sorkar chuan Motor Vehicles (Amendment) Act, 2019 a hmang ṭan dawn. He danah hian dan hmasa aiin lirthei kaihhnawiha dan bawhchhiate sum chawi tur nasa takin a pung. Transport secretary KT Beicho chuan, sorkar laipuiin a nawr nasat vanga dan thar hi hman a nih dawn thu a sawi.

Transport Secretary hian nimin khan an department conference hall-ah thuthar theh­darhtute a kâwm a; Motor Vehi­cles (Amendment) Act, 2019 chu September 1, 2019-a hman ṭan turin government gazette notification August 28 leh 30, 2019-ah a chhuah thu sawiin, "Hei hi state zawng zawng hmang ngei tura min nawrna avangin kan state pawhin September 1, 2022-a hman ṭan turin notification chhuah a ni," a ti.

Motor Vehicles (Amendment) Act, 2019 hnuaia sum chawi tur a sàn êm avangin Transport department-in an minister duh dan anga tihhniam tuma hma an lak thu sawiin KT Beicho chuan, "Kan state mai ni loin, state dang pawhin an buaipui nasa a, pawisa chawi tur tihniam zawngin notification-te an chhuah a ni," a ti a; sorkar laipui pawhin Attorney General ngaihdan an lâk thu a sawi.

Transport Secretary sawi danin, Attorney General chuan, 'Motor Vehicles (Amendment) Act, 2019 chu Parliament dan siam a ni a, chumi zulzui chuan state sorkarin dan hran emaw, pawisa chawi tur tihniam zawngin emaw hma a la thiang lo. Sorkar laipuiin ti tura a tih state-in a ti lo a nih chuan Indian Constitution-a Article 356 chu state sorkar chungah lekkawh theih a ni' tiin a chháng a ni.

Transport minister TJ Lal­nuntluanga duh dan angin amendment act zirchiang turin Law & Judicial department-ah thawn a nih thu sawiin Beicho chuan, "Law & Judicial department chuan Attorney General duh dan anga kal turin min rawn hriattir a ni," a ti.

KT Beicho chuan, Transport department-in VAHAN.40 leh SARATHI 4.0 software a hman mek thu sawiin, "Software-te hi Ministry of Road Transport & Highways (MoRTH) duh dan anga centralise a ni a, siam danglam turin state-in thuneihna a nei lo," a ti a; sorkar laipui chuan VAHAN.40 leh SARATHI 4.0 chu Motor Vehicles (Amendment) Act, 2019 mila an siam danglam vek tawh thu a sawi.

Transport Secretary chuan, MoRTH chuan state tinte e-Challan kalpui tura a tih thu sawiin, "E-Challan hman a nih chuan dan bawhchhetute'n office-a kal ngai loin, hmun leh hmunah an duh chuan an chàwi tur ang an cháwi thei dawn. He dan siamṭhat hi dan bawhchhiate hremna tur a ni a, dan zâwmtute tan a hlauhawm lo," a ti.

Zawhna chhangin Transport department hotute chuan, Motor Vehicles (Amendment) Act, 2019 chu India hmarchhak state dangah hmang ve tawh an awm leh awm loh an hriat loh thu an sawi.