I Day-a CM thusawi ṭhenkhatte Zirlai 99,492-te a thlàwnin zirlaibu pe

Samagra Shiksha hnuaiah School Education department-in kum 2021-22 chhungin zirlai 90,835 hnenah a thlàwnin school uniform a pe a, zirlai 99,492 hnenah a thlàwnin zirlaibu (textbook) pek a ni.

Independence Day, August 15, 2022-a Chief Minister thusawia tarlan dan in, kum 2021-22 chhunga zirlai 90,835 hnena a thlàwna uniform pekte chu mipa 47,086 leh hmeichhia 43,749 an ni a; zirlai 99,492 hnena a thlàwna zirlaibu pek zingah mitdelte zirlaibu (braille textbook) a tel.

Kum 2021-22 chhungin middle school pali, high school pali leh higher secondary school pahnihte dinhmun sang zawka hlàn kai (upgrade) a ni a; sikul 64-ah electric connection pek niin, hmun 37-ah tui thianghlim in tur siamsak a ni. Zun-in 192 leh pianphunga rualbanlo zirlaite tan ramp/handrail 25 siam a ni a; H/S 37 leh HSS 15-ah zirlai 6,493 tan vocational education kalpui niin, elementary school 547 leh HS leh HSS 270-ah sanitary napkin vending machine leh incinerator dah a ni bawk.

CM Speech-a tarlan danin, Accounts & Treasuries chuan kum 2021-22 chhung khan sorkar hnathawk pension 1,137 leh pension kaihhnawih dang 463 an chingfel.

Sorkar kum kal ta chhungin Accounts & Treasuries-in New Pension Scheme kaihhnawih 487 an chingfel a, March 31, 2022 thlengin NPS subscriber mi 9,515 hnenah sorkar do lêtna sum Rs 44,43,56,723 pek chhuah niin, subscriber-te account-ah thun a ni.

Kum 2021-22 chhung vêkin Mizoram State Legal Services Authority-in ukil rawihna tur sum nei lo mi 3,197-te tan ukil a rawihsak a; MSLSA leh District Legal Services Authority-te hmalaknain khaw 678-ah legal awareness campaign neih niin, khaw 14-ah outreach/mega camp buatsaih a ni. Lok Adalat-ah thubuai ngaihtuah 9,908 zinga 3,605 chinfel a ni bawk.

CM Speech-a tarlan danin, Women & Child Development department-in district tina maternity benefit (nau nei hamṭhatna) a kalpuiah nau pai leh nau hnute pe lai mi 5,283 hnenah kum 2021-22 chhungin ṭanpuina sum pek a ni a, ṭanpuina hi Rs 5,000 zel pek a ni.

Commerce & Industries department-in SEDP hnuaiah puantaha eizawng mi 438 hnenah ṭanpuina cheng nuai 260 an pe tawh a; Ministry of DoNER leh NEC hnuaiah Siaha Council Vaih-ah Mara Handloom & Weaving Centre din tum niin, Special Development Project hnuaiah Phuaibuangah Handloom Training cum Production Centre leh Lengpuiah Handloom & Handicraft Residential Training Centre din mek a ni.

Rural Development department kaltlangin MGNREGA hnuaiah chhungkua 2,08,829 hnenah job card pek a ni a, chu'ng mite tan chuan kum 2021-22 chhungin inhlawhna siam a ni. In sak ṭanpuina PMAY-G hnuaiah mi 6,600-te in sak ṭanpuina sum pek a ni tawh.

RD department-in sorkar kum 2020-21 atan ramri depa awm RD block 15 huam chhungah hmasawnna hna hrang hrang 178 thawhna atan cheng nuai 2,731 ruahman a ni a, chuta tan chuan June 14, 2022 khan Ministry of Home Affairs-in sum a rawn pe kim tawh.

CM Speech-a tarlan danin, Public Health Engineering department-in Jal Jeevan Mission hnuaiah kum 2020-2022 chhungin thingtlanga mihring chenna in (rural household) 1,34,028 awm zinga 85,231 hnenah tui connection Functional House Tap Connection an pe tawh a, khawpuiah tui connection 1,13,800 an pe tawh bawk. Tui connection pekah hian khaw 177 an tuam tawh a ni.