ZPM-in an policy an tlangzarh ; Sorkarna siam kan inbeisei - ZPM President

Zoram Peoples Movement (ZPM) chuan an policy - Sustainable Development & Reform Policy (SDRP) tih chu nimin khan Vanapa Hall-ah an tlangzarh. Tlangzarhtu ZPM president Lalliansawta chuan, kum 2023 inthlanpuiah ZPM-in sorkarna siam an inbeisei tih a sawi.

Lalliansawta chuan, kalphung thar, mipui sorkar din tumin kum 2018 MLA inthlan dawnah ZPM din a nih thu leh an thil tum tihlawhtling turin hma an lâk char char thu a sawi a, "Kan au aw Zoram mipuite'n an dawngsawng ṭha hle. Pathian ṭanpuinain sorkarna siam kan inbeisei ta viau. Kan policy tlangzarh tâk hi ZPM ruangám tak tak a ni," a ti.

ZPM-in sum sem an duh lo tih sawiin Lalliansawta chuan, "Sum sem tur pawh kan nei lo. Hna leh nihna tiam kan tum hek lo. Mi tin mahni leh mahni inṭanpui thei tura siam kan tum. ZPM-ah hian a mawm a awm lo a, thlan tui a awm," a ti a; an party thil tum chu a rit zawnga ngaihtuah tan chuan party danga pènna tham a nih thu a sawi.

ZPM President chuan, tun ang renga Mizoram sorkar a kal chuan Mizoram chu smuggler-te zalenna hmunah a chan theih dawn thu sawiin, "Kuhva ringawt pawh buai­pui chhung a reizia leh a nghawng lenzia kan hria. Smuggler ho hmunpuiah kan tu leh fate an seilen a hlauhawm. Thawhrimna leh dikna lo chuan kan ram kan her ngil zawh loh a hlauhawm a ni," a ti.

ZPM policy tlangzarhna inkhawm hi ZPM working president K Sapdanga'n a kaihruai a, ZPM leader Lalduhoma pawhin thu a sawi a, general secretary Dr KC Lalmalsawmzauva'n policy a sawifiah.

SDRP hi hlâwm 14 - Agriculture & Allied Sector, Industries, Power & Electricity, Tran­sport & Communications, Water, Education, Health & Health Care, Social Security & Welfare, Admi­nistrative Reform, Financial Reform, Sports, Tourism, Ramri leh Sawhthingahte ṭhen a ni.