Khaw 58-ah chenna in 788 a chhia

Disaster Management & Rehabilitation (DMR) minister Lalchamliana chuan, tun hnaia thlipui leh rialin Mizorama khaw hrang hranga in a tihchhiat dan leh sorkar aṭanga ṭanpuina pek dan nimin khan a sawifiah a; thli leh rialin district pakuaa khaw 58-ah chenna in 788 a tihchhiat thu leh thawm ṭhat ngaihna awm lo khawpa chhe nasa 46 a awm thu a sawi.

Lalchamliana chuan, chhiatna chu Hliappui khuain a tuar nasa zual tih sawiin, "Rialin in 268 a tichhia a, chung zinga 189 chu in chung chhe vek, a thara thlak ngai leh a bak in 79 chu a chung a ṭhen chhiate a ni," a ti. 

DMR Minister chuan, Hliappuia chhiat­na thlen thu hriat a nih veleh bialtu MLA L Thangmawia a hmuna a kal nghal te, Mizoram Synod-in rangva bundle 200 leh a kilhna tur hmanrua ṭhahnem tak an pe leh Rural Deve­lopment department-in rangva bundle 100 an pe chu lawmawm a tih thu a sawi a; sorkar leh bialtu MLA-te'n Rs. 29,21,197 man rangva bundle 688 a báa an lâk chu sorkarin a rulh tur thu a sawi bawk.

Sorkar laipui inkaihhruaina angin chhiat tâwkte tan ṭanpuina awm thei ang angte Mizoram sorkarin a ngaihtuah mek thu sawiin Lalchamliana chuan, "In chhe vek leh a ṭhen chhiate ṭanpuina dawn inthlau lutuk chu a endiktu tan luhaithlak tak a ni a, mahse, a theih ang angin sorkarin a chingfel ang," a ti.

DMR Minister tarlan danin, Hliappuia in chung chhia thawm ṭhat nan rangva bundle 890 hman a ni a, thâ 4,033 sèn a ni.