Ramsar Site-ah Palak Dîl puan a ni

Mizorama dil lian ber, Pala Dîl (Palak Dîl) leh a chhehvel chu khawvela wetland humhalh leh enkawl bik, Ramsar Site-ah Convention on Wetlands chuan a puang.

Sorkar laipuia Ministry of Environment, Forests & Climate Change (MoEFCC) minister Bhupender Yadav chuan July 26, Thawhlehni khan India rama wetland panga chu MoEFCC-in Ramsar Site-ah a pawm thar thu Twitter kaltlangin a puang a; khawvel huap pawha hmun pawimawh leh humhalh bik tur a nih thu a tarlang.

Palak Dil (Mara ṭawngin Pala Dil) hi Siaha district-a Phúrà khaw bulah awmin, tuipui (sea level) aṭanga metre 274-a sangah a awm a, dîl leh a chhehvel sq.km. 24 chu reserved forest a ni. Ramngaw, kum tluana hring rengin a hual vel a, sava chi hrang hrang, bawk vâka kal chi (reptiles) chi hrang hrang, naubán leh thing chi hrang hrang a la tam hle a ni.

Ramsar website tarlan danin, Pala Wetland hi Mizorama natural wetland lian ber a ni a, dil bik chu chawhrualin metre 16-a thûk a ni. Dil leh a chhehvel, wetland huam chhungah rannung leh ramsa chi hrang hrang eng emaw zat a awm a; chu'ng zingah chuan mammal lam chi pasarih, sava lam chi 222, amphibian lam chi 11 leh bawkvâk chi (reptile) 21 a tel.

Mizorama váng tawh tak sazuk (sambar deer), sanghal chi khat (wild pig - Sus scrofa), sakhi (barking deer - Muntiacus muntjak), záwng chi hrang Hoolock gibbon (Hoolock hoolock) leh Phayre’s leaf monkey (Trachy­pithecus phayrei)-te a la awm bawk.

Ramsar Site puangtu Convention on Wetlands hi khawvela sorkar hrang hrangte'n khawvela wetland leh a chhunga thil awmte humhalhna tura kum 1971-a an din a ni a, Convention atana inremna an ziahna khawpui Ramsar, Iran hming chawiin Ramsar tih a ni. Convention chuan kum 1975 aṭangin a takin hma a la ṭan a, tunah hian United Nations-a tel ram zinga a tam ber (90%) vel chu an tel a ni.

Ramsar Convention hian khawvel ram hrang hranga wetland-te chu Ramsat Site atan a puang ṭhin a, tun dinhmunah Ramsar Site 2,330 chuang hret a awm mek a, India ramah 54 a awm tih Ramsar website chuan a tarlang.

Mizoram sorkar thuchhuah tarlan danin, Mizoram sorkara Environment, Forests & Climate Change department chuan Pala Dil leh a chhehvelah thing leh mau leh nungcha a tam bakah, hmun danga hmuh tur awm zen zen tawh lote pawh a awm avangin Ramsar Site-ah puan a nih theih nan MoEFCC kaltlangin Ramsar Secretariat-ah rawtna a thlen a ni.