Damdawi fak ṭhin laka fimkhur turin chah
Health & Family Welfare department chuan thuchhuah siamin, social media-a damdawi fakna chungchangah fimkhur turin mipui an chah a; tunlaia social media kaltlanga chêrna leh ngona damdawi hmangtute'n harsatna an tawh nasat thu an tarlang.
Health department chuan, damdawi fakna thehdarh ṭhintute chu mihring hriselna tihchhiat vek theihna a nih avangin ti tawh lo tura chahin, dan bawhchhia mante chu dan anga hrem an nih dawn thu a tarlang a ni.
HFW department chuan, hun eng emaw chen kal tawh aṭangin social media kaltlangin uchuak tak taka damdawi fakna hmuh a ni ṭhin tih tarlangin, "Hetianga damdawi fak hi dan khap a nih bakah, a hmangtu tana thil pawi tak thleng thei a nih avangin Food & Drugs Administration, Mizoram chuan a thehdarhtute ûm zuiin, hmuh chhuah theihte chu na takin a lo zilh tawh ṭhin," a ti.
Tun hnaiah natna benvawn neite tan leh a bikin ṭhalaite duh zawng tur damdawi fakna uchuak leh dik lo hmuh tur a la awm tih sawiin HFW chuan, "Heng damdawite hi an ṭhatpui tak zet em tih chu a hmangtute'n an hre ngei tur a ni a, damdawi an fakte nihphung FDA-in a zir chiannaah erawh chuan a pawi theihna bûk a rit daih zawk vek a ni," tiin an tarlang.
HEALTH DEPARTMENT TARLAN ṬHENKHAT
1) ZMC-a Adverse Drugs Reaction Monitoring Centre - Pharmacovigilance Cell chuan tunlaia damdawi an fakte hman avanga harsatna nei report tun hnaiah an dawng nual a, social media kaltlanga an hmuh chêrna/ngona damdawi hmangtute an ni.
2) Chêrna/ngona damdawi hmangtute insawiselna tlangpui - lungphu rang, taksa chau ngawih ngawih, chî-àina, muthilh theih loh, thil nin ngawih ngawih leh chaw pâi nuam lo.
3) Tunlaia damdawi fakna darh mekte chu, Lishou - cherna damdawi (sibutramine), ngona damdawi (glutathione), cindella infusion, tha ná (nerve) damdawi, adt.
4) Damdawite hi doctor hriatpuina awm lo leh sumdawnna thil a ni.
5) A hlauhawmna leh damdawi chanchin hre chiang duh chuan FDA Wing, Directorate of Health Services, Dintharah emaw, ZMC-a ADR Monitoring Centre leh RIPANS-a Drugs Information Centre-ah zawh chian theih reng a ni.