END-in MC-a grape wine man ní-ah Hmun dangah zu ûm 23 an man
Excise & Narcotics department (END) mite'n May 27, 2022-a dawr pathum aṭanga grape wine tam tham tak an manna hmun Millennium Centre-ah zu an man tel lo a, hmun dangah zu ûm 23 an man thung. Hetih lai hian, END Minister chuan grape wine phènah zu, beer leh Korean wine man tur tam tak a awm thu a lo sawi tawh a ni.
RTI Act hmanga zawhna chhannaa a lan danin, May 27, 2022 khan END mite chuan Millennium Centre-a dawr pathum aṭangin grape wine tam tham tak bakah, apple juice tlem azawng, Dagon beer búr (can) 15, Kingfisher beer bur 23 leh Soju ûm 88 an man a ni.
May 27, 2022-a END mite'n zu an manna hmun leh an man zat chu - Chanmari-ah whiskey Royal Stag (ml. 750) ûm 13 leh vodka Majic Moment (ml. 750) ûm 10; Babutlangah Kingfisher beer bûr 16, Chanmari-ah Kingfisher beer bûr 54 leh Soju ûm 32, Vaivakawnah Soju ûm 17 an man bawk.
May 27, 2022-a Aizawla grape wine man chungchangah END minister Dr K Beichhua chuan, grape wine mantu Excise enforcement staff-te chu grape wine man tura kal an nih loh thu June 3, 2022 khan a lo sawi tawh.
Dr K Beichhua chuan, grape wine zuartute'n ualau takin an zuar tih sawiin, "A phênah beer, whiskey leh Korean wine-te tam tak man tur a awm. A vaia man kha kan tih tur dik tak a ni tlat. Champhai wine chauh chu ni se inhriatthiam dan a awm dawn. Danah phal loh ni mah se, heti thleng kan inhrethiam a lawm," tiin a sawi a ni.
May 27-a grape wine man ni tlai khan Vanglaini palai zawhna chhangin END Minister chuan, dan phal loh leh khap a nih ang ngeiin grape wine-te chu man a nih thu a lo sawi tawh a, "Dan phal loh thil a ni a, ualau taka zawrh a ni hi a dik lo hrim hrim," a ti.
Millennium Centre Dawrkai Association pawhin Millennium Centre-ah zu man tel a nih loh thu an tarlang tawh bawk.