NHM, Mizoram hnuaia thawkte Tiam chin awm loin an nuar dawn
National Health Mission (NHM), Mizoram hnuaia thawkte chu Mizoram sorkar hotute nen an inbiakrem theih loh avangin tiam chin awm loin a huhoin chawlh an la chhunzawm dawn a, an nuar dawn.
NHM hnuaia thawkte hi NHM Employees Union, Mizoram (NEUM) bultumin an thil phût chi hrang hrang tihlawhtling tura sorkar kar nan July
11, 2022 aṭang khan mass casual leave an la a, mass casual leave hi July 13, nimin thleng la turin an inruahman a ni.
July 12, Thawhlehni zan khan deputy chief minister Tawnluia leh Health minister Dr R Lalthangliana bakah, sorkar hotu dangte nen inbe mah
se, inremna an nei thei lo a; a huhoa chawlh an lak hnuah tiamchin awm loin an nuar dawn ta a ni.
NEUM chuan, Deputy CM leh Health Minister hoa an sawihona chu nimin khan an ngaihtuah tih sawiin, "Kan demand hrang hrang atana kan
lungawina khawp kan hmuh loh avangin mass casual leave kan lak hi zo tawh mah se, indefinite strike (tiam chin awm loa lungawi lohna lantir) chhunzawm mai ni se, tiin a rêl ta a ni," an ti.
NEUM chuan mass casual leave leh strike an neih avanga mipuite'n hriselna kawnga harsatna an tawh palh theihah mipui hriatthiamna an ngen a ni. NEUM thuchhuah chuan, NHM-a thawkte harsatna chinfel a nih theih nan sorkar hotute hnenah vawi tam tak an thlen tawh tih sawiin, "Sorkarin Covid-19 chhuanlamin, hripui léng a ziaawm huna hmalak min tiam. Covid donaa frontline-a ding tur kan ni tih inhriain department
dangte offi ce an chawlh chhung zawng zawng khan kan duty a, office kal kan ṭhulh ngai lo. Kan thla tin hlawh erawh thla kipin min pe ngai lo," an ti.
NEUM tarlan danin, an thil phûtte sorkarin a tihhlawhtlin loh avangin lungawi lohna lantir an lo tum tawh a, mahse, sorkarin Mizoram Essential
Service Maintenance Act, 1990 (MESMA) a puan hnan a ni. Special provision siamin a hun taka hlawh pek an tiam bakah, an thil phût dangte pawh Study Group siamin ngaihtuah an tiam bawk.
Study Group report chu Cabinet meeting-a pharh turin a awm tia hrilh an nih thu sawiin NEUM chuan, "April 2022-ah peihfel tawh angin hriattir kan ni. Vawi hnih/thum Cabinet meeting an neih hnuah pawh ngaihtuah a ni lo," an ti. NEUM tarlan danin, kumin January aṭanga March thla hlawh chu April thlaah an la a, April-June hlawh pawh pek an ni lo reng a, mass casual leave lak sawi rik a nih hnu, July 8, 2022 khan April leh May hlawh tur siam a ni.
June 18, 2022-a Supreme Court orderah a hun taka hlawh pek loh chu dan kalh ani tih a nih thu sawiin NEUM chuan, "Kan harsatnate min ngaihtuahsak leh tihziaawm tum tura kan beisei lah chuan fa hrawn enin min en emaw ni, July 8, 2022 khan MESMA min puan khum leh ta hi a mak kan ti hle a ni," an ti.