NHM-a thawkten a huhoin chawlh an la FEMSE-in lungawi lohna lantir an titawp

National Health Mission (NHM) hnuaia thawktute chuan sorkara an thil phut hrang hrang tihhlawhtlin phutna atan July 11-13, 2022 chhung chawlh (mass casual leave) an la. Samagra hnuaia thawkte chuan an hlawh tihpun phuta vawiin aṭanga pisa leh sikula kal thoa hnathawh loh (pen down strike) neih an tum chu an ṭhulh a, lungawi lohna lantir an titawp nghal.

NHM Employees Union, Mizoram (NEUM) chuan July 6, 2022 khan thuchhuah siamin, sorkarin NHM contract staff-te hmakhua ngaihtuahtu tur Study Group August 2021-ah a din tawh tih sawiin, “An hmalakna leh report April 2022-a zawh tawh tun thlenga min tihkhawtlaisak te, vawi tam tak sorkar hotute leh department hotute kan dàwr tawh chunga ngaihsak tak tak kan ni lo ṭhin hi hriatthiam harsa kan ti hle,” an ti.

NEUM hruaitute'n Vanglaini zawhna an chhan danin, NEUM-te chu an manganna a rei tawh a, kum 2018 aṭangin Cabinet-ah an chungchang ngaihtuah hun an ngaichang ṭhin a, tun thlengin ngaihtuahsak an la ni lo. March, 2022 a lunglawi lohna an lantir ṭumin Dy. Chief Minister-in Study Group report ngaichang phawt tura a ngen angin lungawi lohna lantir an titawp a ni.

Study Group report hi Health department pawhin an la hmu lo tih sawiin NEUM hruaitute chuan, "Chief Minister, Dy. Chief Minister leh Chief Secretary-te chiahin an hmu a ni. A nghaktu dinhmunah din chuan a rei tawh hle. Ni thum chhung mass casual leave kan la ang a, awmzia a neih loh chuan kan kalzel dan tur committee-in a rel ang. Kan mangang tawh a, ngawih mai kan tum tawh lo," an ti.

NEUM hruaitute chuan lungawi lohna lantir an tum chungchangah hian July 7, 2022 khan Health Secretary hoin an inhmuhkhawm thu sawiin, "Kan lungawina tur engmah a awm chuan loh avangin mass casual leave hi la lo thei kan ni tawh lo," an ti a, dinhmun ṭha zawk phuta an hmalakna hrang hrangah an pawl chu an inlungrual thu an sawi.

Chawlh an lak turah chawlh an lak lohna atan sorkarin Essential Commodities Act a puan hnan thu sawiin NEUM hruaitute chuan, "He act hnuaiah hian Supreme Court chuan order a chhuah tawh a, hlawh ṭha takin an la tur a ni a tive tho. Sorkar pawhin tih tur a nei ve. Tunah hian thla thum chhung hlawh kan la tawh loa, thla li hlawh la tawh lote pawh an awm," an ti.

Samagra hnuaia thawk inzawmkhawm pawl, Federation of Mizoram Samagra Employee (FEMSE) pawhin an hlawh tihsan phutna atana July 7, 2022 aṭanga badge dum an bel hnuah vawiin aṭangin pen down strike neih an tum a, mahse nimin tlaia Education Secretary hoa an ṭhutkhawm hnuah an thil tum hi an ṭhulh a, tiamchin awm loa badge dum an bel pawh an titawp nghal.

FEMSE chuan thuchhuah siamin, nimin tlai dar 3 khan Education Secretary leh State Project Director, Samagra-te nen an ṭhutkhawm thu tarlangin, "Sorkar hmalakna kal zel leh hmachhawpte inhrilhhriatna neih a nih bakah FEMSE lam aṭang pawhin kan lungawi lohna bakah kan beiseinate sawina hun ṭha tak kan nei thei a ni," an ti.

Official-te hian an hlawh ennawnna tur atan hmalakpui zel an tum bakah, Chief Minister appoinment buaipui sak tura an ngenna pawh bawhzui sak an tum thu tarlangin FEMSE hian, "FEMSE member-ten OB hmalakna leh rorelte hrethiam a, lo pawm ṭheuh turin member te kan in chah," an ti a, an dinhmun siamṭhatna tura kawng awm thei tibuai zawnga hma la lo turin an member-te an ngen nghal.