Bairabi-Mamit kawng NH-ah puang

Ministry of Road Tran­sport and Highway chuan Bairabi leh Mamit inkar kawngpui chu New National Highway no. 6-ah rin luh tel a ni tih a puang.

Rajya Sabha MP K Van­lalvena leh Road & Infra­structure Development Board vice chairman H Lalzirliana, MLA te chuan July 5, 2022 khan Road Transport and Highways minister Nitin Jairam Gadkari hmuin, Bairabi-Mamit kawngpui chu national highway-a puang turin an ngen a; Minister pawhin NH-ah puan thuai a nih tur thu a lo hrilh a ni.

Ministry of Road Tran­sport and Highway director Rajesh Gupta chuan July 5, 2022 vêk khan hriattirna (notification) chhuahin, Bairabi-Mamit inkar kawngpui chu New NH-6 ah telh a nih thu a tarlang.

NH-6 hi Assam-a Jorabat aṭanga inṭanin, Shillong paltlangin Dhaleswar, Bairabi, Kolasib, Aizawl, Seling, Champhai paltlang zelin Zokhawtharah a tàwp a; New NH-6 chu NH-6 aṭangin Bairabi-ah pengin, Mamit khaw dáiah NH-108 a pawh dawn a ni.