MHIP Day vawi 49-na lawm a ni

Nimin July 6 kha MHIP Day vawi 49-na a ni a, Mizoram hmun hrang hrangah hlim taka lawm a ni a, hnam làmte entir a nih bakah, intihhlimna hun hman a ni. Hmun ṭhenkhatah chuan minister, MLA leh AMC councillor-te leh sorkar official-te'n an hmanpui.

Mizo Hmeichhe Insuih­khawm Pawl hi kum 1974-ah din a ni a, tunah hian sub-head­quarters 10, block 26, joint 19 leh branch 753 a awm mek a ni.

MHIP hmunpui (general headquarters)-a hruaitute (committee) chu Court-in a ṭhiah rih avangin hruaitu an awm rih lo a, sorkar aṭangin enkawltu (administrator)-in a enkawl mek. Hei vang hian MHIP hmunpui aṭangin MHIP Day hmanpuitu tur an awm rih lo.

MHIP Day hi minister of state K Lalrinliana chuan Kolasib Venglai Branch-in Taitesena Hall-a an lawmna a hmanpui a; Minister chuan, MHIP chu tlawmngai pawl, mi dangte ṭanpui tura intelkhawm an ni tih sawiin, chhungkua leh páwl anga hnathawhna hrang hrangahte Kristian an nihna tilang zel turin a chah a, "Hmeichhiate dinhmun châwi kân nan leh an dikna chanvo humhalh nan sorkarin dan hrang hrang a duante hriat leh zirchian a ṭul," a ti.

Minister of state Lalruat­kima chuan a biala Tuikual North Branch-in MHIP Day an lawmna a hmanpui a, "Foreign-a hnathawk tam zawk hi hmeichhia an ni a, passport buaipui tam zawk hi hmeichhia an ni. Dawrah kal ila, bazarah kal ila, sa sât chenin hmeichhia an tam zawk vek. Nute hian kan fa mipate hi kan enkawl hriam tâwk lo em ni aw, tiin ka ngaihtuah ṭhin," a ti a; fate hriam lehzuala enkawl tur te, aia upa zahna leh tlawmngaihna chhawm nung tura enkawlna ṭha zawk pe turin nute a chah.

MLA Vanlalhlana'n a biala Chaltlang Branch-in MHIP Day an lawmna a hmanpui a; Mizo hmeichhiate'n hma an sawn nasat thu a sawi rualin, kohhran leh politics-ah hmabak a la awm thu a sawi a, "Hmeichhiate hmasawnna hi Mizote hmasawnna a ni, chu tur chuan mipate'n tih tur kan nei a ni," a ti.

Aizawl North-II bialtu MLA Dr Vanlalthlana'n a bial chhunga Ramhlun Venglai Branch leh Ramthar Veng Branch-in MHIP Day an lawmna a hmanpui a; Aizawl South-I bialtu MLA C Lalsawi­vunga'n a bial chhunga Republic Veng Branch leh Republic Vengthlang Branch-te hmanpuiin, Aizawl West-III bialtu MLA VL Zaithanzama'n a biala Khatla Branch leh Khatla South Branch-te a hmanpui.

Aizawl Municipal Corpo­ration-a Ward-III councillor C Lalchhandami'n a biala Ramhlun North Branch, Ward-XVI councillor R Lalawmpuii'n a biala Bethlehem Vengthlang Branch leh College Veng Branch-te hmanpuiin Rs 5,000 ve ve a pe a; Ward-XIV councillor Ramthanzauvi'n a biala Mission Vengthlang Branch hmanpuiin, Ward-VIII councillor Christina Roluahpuii Sailo pawhin a biala Armed Veng leh Chite Veng Branch a hman pui a, day lawmpuina pawisa a hlan bawk.

Khawzawl district bawrhsap CC Lalchhuangkima pawhin Tualpui Branch a hmanpui a, volleyball, volleyball net leh Rs 3,000 a pe a ni.