Cabinet-in agenda pasarih an pawm ; Pawm zingah FEMSE hlawh pun a tel lo

Council of Minister chu nimin khan chief minister Zoramthanga kaihhruaiin Cabinet room-ah an ṭhukhawm a, agenda lut 10 zingah pasarih an pawm. Agenda ṭhenkhat chu zirchian belha ṭhutkhawm leh huna sawiho turin an dah.

Agenda zingah hian chief minister Zoramthanga'n Fede­ration of Mizoram Samagra Employee (FEMSE) hnena a lo tiam tawh, Samagra hnuaia thawkte hlawh tihpun chung­chang pawh a tel a, mahse, sorkar thuchhuahin Council of Minister-in agenda an pawmte a tarlan zingah a tel lo.

Vanglaini palai zawhna chhangin School Education minister Lalchhandama Ralte chuan, Samagra hnuaia thawkte hlawh tihpun rawtna lut chu hnâwl a nih loh thu a sawi a, "Technical thilah siamṭhat deuh ngai a awm a, chu chu siamṭhain remchang hmasaah chhawpchhuah leh turin kan dah," a ti.

FEMSE hruaitu ṭhenkhat chu nimin khan Council of Minister rorel ngaichângin an awm khawm a ni.

Hetihlai hian FEMSE chuan an member-te tan thuchhuah siamin, an beisei loh dan deuha thu an dawng chu hriatthiam har an tih thu an tarlang a, "Hei leh chen kan nghah hnuah kan beisei ang thu kan dawng thei lo hi pawi kan ti takzet a, member-ten min hrethiam hram turin kan ngen che u. Kan hruaituten engpawh rel se huai taka zawm vek turin kan in ngen nghal a ni," a ti.

FEMSE hian an kalzel dan tur chu July 7, 2022 hian an rel ang.