Chief Minister-in PUC Grand Celebration a hmanpui

Pachhunga University College chuan April 8, Inrinni khan National Assessment and Accreditation Council (NAAC) accreditation thar bera A+ Grade an hmuh te, kum 2015-16 atana Indira Gandhi NSS National Award chi thum an dawnte leh MZU Annual Sports Meet 2017-a an champion-te an lawm a; chief minister Lal Thanhawla'n a hmanpui.

PUC Grand Celebration hi PUC Multi Complex Auditorium-ah neih a ni. PUC hian NAAC re-accreditation cycle thar berah A+ Grade an hmu a, kum 2015-16 khan President Pranab Mukherjee kut aṭangin Indira Gandhi NSS National Award chi thum an dawng a; kumina MZU Annual Sports Meet-ah a pumpuiah an champion bawk a ni.

CM Lal Thanhawla chuan, PUC-in NAAC accreditation-ah Mizoram college-te zinga grade sang ber A+ a hmu thei chu a lawmpui thu sawiin, "College principal, zirtirtute leh zirlaite thawh rah a ni," a ti.

Indira Gandhi NSS National Awards chi thum an dawng chu an chhuanawm a tih sawiin, "Hei hian Mizo zirtirtu leh zirlaite hi an duai bik lo tih a tilang a, an tum a ruh a, theihtawp an chhuah chuan mid ang an tluk theih lohna tur a awm lo," a ti.

Zirlai leh ṭhalaite chu ram leh kohhran hruaitu tur leh ram nghahfâk an nih thu sawiin Lal Thanhawla chuan, "Chutiang tling tur chuan nu leh pate thu an awih a, aia upa an zah thiam a, Mizo nun mawi an vawn nun tlat a ngai," a ti.

PUC campus chu Aizawl khawpui timawitu berte zinga mi, ngaw a ṭhat vanga 'Khawpui chuap' tih theih a nih thu sawiin, campus chhunga chhunga thing leh maute chu humhalh turin zirtirtu leh zirlaite a chah.

PUC principal Dr Tawnenga chuan, an college-in an tum ber chu, Mizoram mamawh ang zel leh Mizoramin a chhawr theih tur thiamna tak tak paw chhuak thei zirlai chher chhuah a nih thu a sawi a; Mizoram University vice chancellor Prof. Lianzela'n lawmpuina thu a sawi bawk.

Pachhunga University College hi August 15, 1958-ah din a ni a, a tirah chuan Aijal College tih a ni. Kum 1965-ah sorkarin a la (provincialise) a, kum 1979-ah North Eastern Hill University (NEHU) hnuaia constituent college hmasa ber a ni. Tunah hian zirlai sang hnih chuang an awm a, zirtirtu nghet 104 leh thawktu dang 97 an awm a ni.



Share this Post

Login to comment
No Comments