UPSC Prelims-a tling Mizote Synod-in ṭanpui dawn

Kumina UPSC Civil Services Examinations-a preliminary exam-ah Mizoram aṭangin mi 12 an tling a, chu'ng zinga mi pasarih chu Mizo an ni. UPSC Prelims Exam-a a vawi khatnaa tlingte hnenah Mizoram Synod hnuaia Zirlai Viltu Committee chuan an inbuatsaihna puihna atan Rs 50,000 ṭheuh pek a tum.

Kumina UPSC Civil Services Prelims exam-ah hian Mizoram aṭangin Mizo pasarih leh hnam dang panga an tling a; Mizo pasarihte chu - Betty Lalrinfeli, Z Lalnghaktluanga, Andy C Lalramchhana, J Lalawmpuia, Lalzara, Vanlalhruaii leh KC Zalena te an ni a; an zinga ṭhenkhat hi chu nikumah pawh Prelims lo paltlang tawhte an ni.

Synod Zirlai Viltu Committee secretary Zirkungi Chhakchhuak chuan hriattirna tichhuakin, UPSC Civil Services Prelims exam-a vawi khatna atana tling Mizote hnenah Mains exam atana an inbuatsaihna atan incentive cash award Rs 50,000 ṭheuh pek tum a nih thu a tarlang a, July 7, 2022 ral hmaa inhriattir turin a ngen.

Mizoram Synod chuan central service leh all India service-a Mizote an luh tam theihna tura mamawh lamna atana Sikulpui, Sikulpuikawnah Synod Resource Centre an buatsaih a, September 20, 2021 khan hawn a ni. Synod Resource Centre hi Zirlai Viltu Committee-in an enkawl a, all India service leh central service hrang hrang (group A leh B)-a luh tumte tana inzirna leh inbuatsaihna atana din a ni. Tunah hian graduate tawh mi 53 leh la graduate lo zirlai 30 chuang hret an inziak lut tawh tih Synod Zirlai Viltu Committee Secretary chuan a sawi.

Hetih lai hian, Mizoram aṭanga UPSC Civil Services Prelims exam-a tling zingah hian Mizoram sorkar, Mizoram Youth Commission buatsaih Super IAS 20 programme hnuaia inzirte an tel lo nia thu dawn a ni.