Ruahsur vanga chhiatna thlen thu DMR department-in 34 an dawng

Tun hnaia ruahsûr nasa avangin Mizoram hmun eng emaw zatah chhiatna a thleng a, June 18-25, 2022 chhung khan Disaster Management & Rehabilitation (DMR) department chuan hmun 34-ah chhiatna thlen thu an dawng.

DMR department hotute hnen aṭanga thu dawn danin, chhiatna thleng 34 zinga 10 chu Aizawl district-a thleng a ni a, Lunglei district-ah pasarih, Khawzawl district-ah pali, Kolasib, Lawngtlai leh Mamit district-ah pathum ṭheuh, Champhai district-ah pahnih leh, Siaha leh Serchhip district-ah pakhat ve ve a thleng.

Chhiatna thlenna hmun 34 zinga 25 chu leimin a ni a, hmun paliah lungrem (retaining wall) chhia, hmun pakhatah lei khi, thli tlehin a tihchhiat in pakhat, in kâng pakhat leh tui lian vanga chhiatna pathumte a ni. Tui lian vanga chhiatna hi Sairang, Dapchhuah leh Phaizauah a thleng a, huan thlai eng emaw zat a tichhia a ni.

Vanglaini palaiin a biak theih chinah, Dâpchhuah khuaah tui lianin chhungkaw 30 vel huan a chîm. Dapchhuah YMA Secretary chuan, tun dinhmunah tui lianin ziaawm lam a pan tawh thu a sawi a, "Kan huan thlai leh buhte ni ruk chhung vel tuiin a chîm avangin a chhe vek a ni," a ti.

Sairang YMA hruaitute chuan, tun hnaia tuilian chu kum dang aia an tawrh nêp deuh thu an sawi a, "Thawklehkhata rawn lian phut a nih loh avangin eng emaw chen kan lo insaseng lâwk a, huan thlai a tihchhiat bâk chu chenna in chhia leh tuiin lawng a len bo a awm lo," an ti.

Tlawng lui kamah a ngheta huan siam zinga mi 100-150 vel huan chu tuilianin a chîm hman thu sawiin Sairang YMA hruaitute chuan, "Tuiin a chîm chin zinga nimbu huanah chuan chhiatna a thlen nasa lo," an ti. Vaimim, bawkbawn, bawrhsaiabe leh thlai dang huan nei mi 200 vel an awm thu leh chu'ngah chuan tuilianin a chîm huan thlai a chhiat vek thu an sawi bawk.