END-in Rs 2,64,34,652 hû ruihhlo an hâl

Excise & Narcotics department (END) chuan ruihhlo an man, Court-a chinfel tawh Rs 2,64,34,652 hû chu nimin chhun khan Bethany Multipurpose Farm, Phunchawngah an hâl ral.

Ruihhlo hâl hi chawlhkar hnih chhung hman tur Drug Free Fortnight (Nashe se Aazaadi Pakhwada) hman mek leh June 26-a ruihhlo dona ní, International Day Against Drug Abuse & Illicit Trafficking thleng tur puala tih a ni. Ruihhlote hi kum 2014 aṭanga 2022 chhunga thubuai 124-a mite a ni a, END commissioner Ngurchungnunga Sailo-in a dep kái a ni.

International Day Against Drug Abuse & Illicit Trafficking - June 26 hi Pathianni a ni a, ruihhlo ṭhat lohzia mipui hnena zirtirna tura END-in film a buatsaih ṭhenkhat chu zan lamah DDK, LPS leh ZONET-ahte tihchhuah a ni ang. Ruihhlo ṭhat lohzia tarlanna banner, pamphlet leh flyers-te thehdarh bakah, ruihhlo laka fihlim tura online-a intiamna e-Pledge nei tura mipui sàwmna tihchhuah a ni bawk.