Bairabi-Sairang rêl kawng siam March 2020-ah zawh tum a ni

Transport minister John Rotluangliana chuan nimin khan Bairabi-Sairang inkara rél kawng siam mek a tlawh a; North East Frontier Railways hotute chuan kum 2020 March-ah zawh theih an inbeisei thu an lo hrilh. 

John Rotluangliana leh amah ṭawiawmtute hian hna thawktute kaihhruaina hnuaiah Bairabi aṭangin Hortoki thleng rél kawng siam mek an tlawh a, hnathawh dan hrang hrangte an thlir. Transport Minister chuan, rél kawng siam mek chu Mizoram ro thil a nih avangin uluk tak leh ṭha taka thawk turin hna thawktute a ngen.

Transport Minister chuan, Railways hotute chu thawh zawh tur hun chhunga an thawh zawh theih lohna tur chhan an nei a nih chuan harsatna an neihte hrilh ṭhin turin a chah bawk.

Railways deputy chief engineer SP Deshmuk chuan, Mizoramah ruahtui a tam avangin hna thawh theih hun chhung a tlem thu a sawi a; rél kawng siam hna chu kum 2019-a zo tura an inngaih laiin, March 2020-ah zawh hman chauh an inbeisei thu sawiin, "A quality lam kan uluk a, lirnghingah pawh eng emaw chen him turin kan ruahman a ni," a ti.

Transport Minister hi parlia­mentary secretary pahnih - Hmingdailova Khiangte leh TT Zothansanga te, MLA R Vanlalvena leh thuthar thehdarh­tute'n an ṭawiawm a ni. 

Bairabi-Sairang rêl kawng hi km. 51-a thui tur a ni a, hmun 23-ah lei verh (tunnel) a awm dawn a, tunnel thui zawng belhkhawm chu metre. 9,487 (km. 9.48) niin, tunnel 17 siam zawh a ni tawh.

Lei (bridge) hmun 44-ah dawh tur a ni a, 8% dawh zawh a ni tawh. Bairabi leh Sairang bakah, Hortoki, Kawnpui leh Mualkhangahte rêl chawlhhmun siam a ni dawn a ni. 



Share this Post

Login to comment
No Comments