Lehkhathiam leh mi taimate tan Sorkarin kawng a hawng - Lalsawta

Finance minister Lalsawta chuan Ningani khan Central Agriculture University hnuaia College of Veterinary Sciences & Animal Husbandry (CVSAH), Selesih a tlawh a, lehkhathiam leh taimate tan sorkarin kawng a hawn thu a sawi.

Lalsawta chuan, Mizo­ramah ran vulha eizawng tam tak an awm avangin veterinary science thiamna ramin a mamawh tak zet tih a sawi a, "Mizoram sorkar hmalakna thar New Economic Development Policy-ah pawh vety hian hmun pawimawh tak a luah a ni," a ti. 

Mizote chu hmanlai aṭanga chuktuah huan, vawk, ar leh ran dang vul ṭhin an nih thu sawiin Lalsawta chuan, "Hralh suma chantir loin, mahni intodelhna tâwk kan thar chhuak ṭhin a, vawiin thlengin kan la chhunzawm a ni," a ti a; hlâwk thama hmalak a hun thu a sawi.

Finance Minister hian a duh apiang tana hman theih tur web kiosk a hawng nghal. Web kiosk hi Agriculture Technology Information Centre building-ah dah a ni a; agriculture, horticulture leh veterinary & animal husbandry kaihhnawiha eizawngte leh a duh apiangin a thlawnin an hmang thei. Lo neih dan, thlai chin hun, ran vulh dan, ran leh thlai enkawl dan leh hriat tur pawimawh dangte a awm a ni.

CVSAH hi kum 1997-ah din a ni a, B.V.Sc. ah department 17 neiin, first year-ah seat 76 a awm a, seat 14 chu Mizoram tana dah a ni. M.V.Sc.-ah zirlai 60 an awm thung. College-ah hian cheng vbc. 30 hû project thawh lai 44 a awm a, mithiamten zirbingna an kalpui reng bawk.



Share this Post

Login to comment
No Comments