June 14-a Covid positivity rate 11.37%

June 14, Thawhlehni khan Mizoramah Covid-19 vei mi 29 hmuh chhuah a ni a, positivity rate 11.37% a ni. Nimin khan hripui vei dam tawh mi 28 chhuahtir an ni a, Covid-19 positive thi an awm lo.

Thawhlehnia Covid-19 positive hmuh chhuahte chu mipa 13 leh hmeichhia 16 an ni a, Rapid Antigen Test hmanga hmuh chhuah vek a ni.

IDSP record angin, Mizoramah Covid-19 vei 2,28,649 hmuh chhuah a ni tawh a, mipa 1,06,449 leh hmeichhia 1,22,200 an ni a, mipa aiin hmeichhia 15,751-in an tam zawk. Nimin tlai dar 5 thleng khan mi 2,27,777 (99.62%) chhuahtir an ni tawh a, mi 701 (0.31%) thi tawhin, enkawl mek mi 171 (0.07%) an awm.

Nimin tlai dinhmun angin, Mizorama district 11 zinga district pathum - Siaha, Champhai leh Lawngtlai district-ahte Covid-19 positive an awm tawh rih lo a; district pangaah mi 10 chuang an awm thung.

Kum 2011 chhiarpui aṭanga chhûtin, Covid-19 positive hmuh tawh zat 2,28,649 chu 20.83% a tling tawh a, mi 1,000 zelah positive 208 an awm ang a ni. Mihring 1,00,000 zelah hripui vangin mi 63 an thi tawh ang a ni bawk.