Lungleiah Free Surgical Camp

Association of Surgeons of Mizoram, North East Chapter of Association of Surgeons-in India leh Indian Society of Anesthesiologist - Mizoram State Branch-te chuan nimin khan Civil Hospital, Lunglei leh Christian Hospital, Serkawnah Free Surgical Camp an buatsaih a, vawiinah chhunzawm a ni ang.

Free Surgical Camp-ah hian Aizawl aṭangin surgeon, anesthesiologist (hnimhlum specialist) leh anmahni puitute leh machine technician-te nen, an vaiin mi 40 vel an kal a, senso zawng zawng an intum vek a ni.

Camp-ah hian major operation tih vek tur a ni a, laparoscopic cholecystectomy (verha mît paih) tur mi pariat, cancer leh kal ṭha lo te, lungtê zai ngai leh zai chi dang tih ngai Civil Hospital, Lungleiah mi 15 leh Christian Hospital Serkawnah mi pariat an awm.

Surgical Camp hawnna Civil Hospital, Lunglei conference hall-a neih chu Lunglei HPC vice chairman Lawmawma Tochhawng, MLA-in a hmanpui a, "Civil Hospital, Lunglei leh Christian Hospital-a zai lam thiam doctor an indaih loh em em lai leh zai mamawh mi tam tak an awm laia inzai hna in rawn thawk hi a ropui tak zet," a ti.

ASM president Dr Saia Chenkual chuan, camp siam turin hun rei tak tawh aṭanga an inruahman thu leh YMA Day a nih anga mi dang tana thil ṭha tih chu a inhmeh hlea an hriat thu a sawi.