Vaivakawna pipe phûmna enfiah

Coordination Committee on Management of Aizawl City member-te chuan June 14, Thawhlehni khan Aizawl additional DC R Vanrengpuia hoin Vaivakawn traffic point aṭanga Chanmari West panna kawng, Hunthar Veng lei tlahniam inkara SIPMIU-in tui pipe an phûmna an enfiah.

Enfiahnaah hian SIPMIU-in hun eng emaw chen tui pipe phûm hna an chawlhsan lailawk tawh chu mipui tana harsatna awm theite thlir tel chungin hna thawh chhunzawm leh thuai dan tur sawiho nghal a ni.

Vaivakawnah hian SIPMIU-in January 14, 2022 aṭangin pipe phûm hna an thawk ṭan a, ni 99 chhunga thawh zawh hman tura ruahman a ni. India President lo kal laia hna chawlhsan lailawk a nih hnuah ruahsurin hnathawh a tihkhaihlak tak avangin hun eng emaw chen an chawlhsan zui a ni.

SIPMIU hotute chuan, pipe phûm chhunzawm thuai an duh thu leh, hna an chhunzawm hun tur chungchangah Coordination Committee on Management of Aizawl City thuchhuak an lo ngaihchàn dawn thu an sawi.

Coordinatioon Committee on Management of Aizawl City hi kum 2019 khan din a ni a, AMC leh department pawimawh eng emaw zat bakah, BSNL leh local council te an tel a ni.