Four lane atan forest clearance la nei lo

Vairengte leh Sairang inkara national highway kawngpui four lane-a zauh turah hna thawktu tur NHIDCL chuan forest clearance an la nei lo a, Environment, Forest & Climate Change (EFCC) department chuan forest clearance tel lo chuan hnathawh an remti lo.

EFCC department hotute chuan, kawngpui siam hna thawh a nih hma ngeiin forest clearance nei turin NHIDCL an hriattir tawh thu an sawi. An sawi danin, kawng zauh hna thawh turah hian environment tichhe tlem thei tur bera hmalak leh dumping ground mumal tak neih pawh a ṭul dawn a ni.

NHIDCL hotute pawhin forest clearance an la neih loh thu an sawi a, "Hma kan la mek. Dumping ground tur hmun pawh siam a la ni lo. Leivûngte chu kawngpui area chin tura ram lâk chinah eng emaw zat a paih theih ang a, a bak atan chuan dumping ground siam a ni ang," an ti.

Hetih lai hian, NHIDCL hnuaia contractor, kawngpui zauh hna thawk tur ṭhenkhat chuan hna thawh ṭan theih veleha ṭan nghal thei turin an khawlte an chhawp tawh a ni.