Ram hruaitute'n YMA Day an hmanpui

Nimina YMA Day lawmna chu ram hruaitu - minister leh MLA ṭhenkhatte'n hmun hrang hrangah an hmanpui a; minister Dr R Lalthangliana chuan Kanan Veng Branch hmanpuiin, mi dang tana malsawmna thlen turin taksa leh rilru hrisel neih a pawimawh thu a sawi.

Dr R Lalthangliana chuan, YMA anga pawl ropui leh ṭangkai, khaw tin leh veng tin dâp leh mi tu pawh huap ang chi India ram leh khawvel ram dangah a awm loh thu sawiin, "YMA danglam bikna leh inenkawlna ṭha tak hi ṭhangtharte tan leh khawtlang tan a hlu em em. YMA branch hrang hrangte'n a thlawna thisen an pe ṭhin hi a lawmawm a, mi dangte nunna chhanna tura YMA hnathawh hi a ropui tak zet a ni," a ti.

ZPM Legislature Party deputy leader Vanlalhlana chuan a bial chhunga Chaltlang Branch-in Chaltlang Field-a YMA Day leh an kum 75-na (platinum jubilee) an lawmna a hmanpui a, "YMA hian thiltum pathum leh thuvawn kan nei a, hengte hi kan ti em, hmasawnna tur kan nei em tih inen lêt nan i hmang ang u," a ti a; ruihhlo lakah fihlim tur te, HIV/AIDS laka inveng tur te, mipat hmeichhiatna hman khawlohna laka insúm turtein ṭhalaite a chah bawk.

Aizawl North-II bialtu MLA Dr Vanlalthlana chuan Ramhlun Venglai Branch silver jubilee leh YMA Day lawmna a hmanpui a; chhungte leh mi dangte kêp ngai loa awm turin mahni kea ding thei tura ṭan lak a ṭul thu a sawi a, "Ram leh hnam humhalhna kawngah ramri chauh humhalh tum lo a, kan hnam hi kan humhalh tel a ngai a ni," a ti.

Aizawl South-I bialtu C Lalsawivunga chuan Venghlui leh Republic Vengthlangah YMA Day a hmanpui a, zirlai hlawhtlingte hnenah chawimawina a hlân.

Aizawl South III bialtu MLA Prof. F Lalnunmawia pawhin Sateek leh Muallungthu khuaahte YMA Day lawmna a hman pui. Prof. F Lalnunmawia chuan YMA chu mitin huapzo, kohhran leh political party hrang hranga awmte pawh zaikhata luanna a nih thu a sawi.