Lawngtlaiah Green MJA Day hmang

Mizoram Journalists' Association (MJA), Lawngtlai district chuan nimin khan Lawngtlai Press Club-ah Green MJA Day vawi sarihna an hmang a, District Rural Development Agency project director Marilyn Rualzakhumthangi'n a hmanpui.

Marilyn Rualzakhumthangi chuan, Lawngtlai district MJA-te'n mi dangte kawng dika hruai tura chanchinbu kaltlanga an ziah mai duh tâwk loa a taka an che chhuak tel chu lawmawm a tih thu a sawi a, "Lawngtlai district-ah hmasawnna hna thawh avangin ramngaw, thing leh mau a chereu nasa hle a, theihtawp chhuaha thing phun belh leh enkawl zui kawngah ṭan lak a ngai," a ti.

District MJA president Lalngheta Ralte pawhin thu sawiin, Green MJA Day thuchah a sawi a, UDPA department-in Swachhta Warrior lawmman an hlan Elvis Lalthangzuala, Lawngtlai district MJA vice president hnenah chawimawina an hlân bawk. Inkhawm zawhah DRDA pisa bul velah thing an phun a ni.