Tlawng kawnga leivûng paihna tur enfiah

Land Resources, Soil & Water Conservation (LRSWC) department aiawhte leh Save Mizoram Rivers hruaitute chuan June 14, Thawhlehni khan Aizawl aṭanga Tlawng lui, Reiek kai panna kawnga leivûng paihte leh leivûng paihna atana hman theih tur hmunte an enfiah.

Maubawk ram chhunga leivûng paihna tur hmun remchang, ruam hnawh khah theih tur an tlawh a; a panna kawng chei ṭhat ngai km. 2 vel a awm avangin, Maubawk LC lamin an la enfiah leh tura dah a ni. Tlawng lui fintu Serluia luang lut, Tlawng panna kawngpui sira leivûng leh bawlhhlawh paih nasatna hmunte enfiah a ni a; paih a nih tawh lohna tura pala hung a nih theih nan an teh nghal.

Serlui fintu Vailui pawhtu luikawr hrang hrang enfiah niin, bawlhhlawh ṭawih thei lo (plastic) danna tur len (steel net) dahna tur hmunte an chhinchhiah a; Reiek kai Tlawng road kawngpui kama leivûng leh bawlhhlawh paih ṭhin tihtawpna tura Save Mizoram Rivers-in gate siam an rawtna hmunte enfiah a ni bawk.

Enfiahnaah hian LRSWC department aṭangin mi panga kalin, Save Mizoram Rivers aṭangin hruaitu pahnih an tel a, Maubawk Local Coucil aṭangin chairman leh member pakhat an tel a ni.