KHAWTHLIR

In saksak
Zawlnuam Bawrai Branch YMA chuan YMA Day pualin an huam chhunga hmeithai pakhat in tur an saksak a, Champhai Zotlang Branch YMA pawhin nimin khan an venga khawsak harsa pakhat chu in an saksak bawk. Bawraia in sakna atan hian bialtu MLA Lalrindika Ralte leh mi ṭhahnemngai dangte'n pawisa an thawh khawm a, YMA-in an saksak a ni.

Hmun enfiah
Siaha New Colony Venga lei tlahniamin kawngpui leh chenna in a tihchhhiat dante nimin khan district bawrhsap Lalsangliana leh Geology & Mining joint director H Lalbiakkimate'n an enfiah. An enfiahna report chu Geology & Mining department-ah an thehlut dawn a ni.

Bungrua hlân
HDFC Bank chuan corporate social responsibility fund aṭangin June 14, Thawhlehni khan Siaha District Hospital hnenah motorised ICU khum panga, multi para monitor, suction khawl, BiPAP khawl leh CPAP khawl panga ṭheuh, ventilator pahnih leh median transport ventilator pathum an pe.

Chawimawina hlân
Tlawng lui humhalh kawnga hma latu Romalsawma, Mission Vengthlang chu nimin khan Central YMA leh Aizawl mayor Lalrinenga Sailo ten chawimawina an hlân. Romalsawma hian Tlawng lui dinhmun hre chiang tur leh humhalh a ṭulna mipui zirtirna atan Tlawng lui chu a hnár Zobawk aṭanga Bairabi thleng kein a zawh chhuak a ni.

Hnathawh thlirho
Serchhip District Development Coordination & Monitoring Committee chu an chairman C Lalrosanga, Lok Sabha MP hoin Thawhlehni khan DC conference hall-ah an ṭhukhawm a, Serchhip district-a sorkar laipui sum hmanga hnathawh hrang hrang an thlirho. 3rd National Water Award, 2020 dawngtu Sialsir khua an lawmpui thu an sawi.