Mizoramah heroin (no. 4) a hluar ; Aizawla home/ centre ṭhenkhat dinhmun

Tunlai hian Mizoramah heroin (no. 4) a hluar hle a, Excise & Narcotics department chuan kuminah May 15 thleng khan heroin kg. 10.081 an man tawh a; ruihhlo ngai enkawlna hrang hrangah heroin vanga enkawl ngai an tam.

Vanglaini-in Aizawl district-a ruihhlo ngaite enkawlna hmun hrang hrang a biaknaah, zu leh heroin vanga enkawl ngai an tam thu an sawi hlawm a, hmun ṭhenkhatah chuan awm thei zat aia tam enkawl tur an awm. Heroin vanga enkawl ngaite chu kum 14-45 inkar an ni tlangpui a, hmeichhia aiin mipa an tam zawk.

Excise & Narcotics department report-a a lan danin, kum 2018 khan heroin kg. 8.56 man a ni a, kum 2019-ah kg. 12.59, kum 2020-ah kg. 11.71, kum 2021-ah kg. 18.90 leh kumin 2022-ah May 15 thlengin kg. 10.081 an man.

Heroin avangin kum 2018 khan mi 17 an thi a, kum 2019-ah mi 18, kum 2020-ah mi pasarih leh kum 2021-ah mi pakhat an thi a, kumina thi zat erawh record a la awm lo. Kum 1984 aṭanga kum 2021 thlengin Mizoramah heroin vangin mi 214 an thi tawh a ni.

TNT, Zuangtui
Thutak Nunpuitu Team (TNT), Zuangtuiah chuan ruihhlo ti ṭhin mi 1,000 vel enkawl mek an ni a, kumin bikah chawh rualin ni tin mi pathum vel lut ziah ang an ni. Enkawl ngai zingah zu leh heroin ti an tam ber a, ṭhalai zingah heroin vanga enkawl ngai an tam bik.

TNT hotute chuan, Pathian chakna ringa ruihhlo do a ṭul thu sawiin, "Zu inte hi chu kum 4/5 an in hnuah enkawl ngai an ni ṭan a, heroin erawh kum 2/1-ah chhungkua an tibuai ṭan tawh," an ti a; nu leh pate chu fate enkawl kawngah Pathian ringa bul ṭan ṭhat a pawimawh thu an sawi.

ṬBCC
Ṭawngṭai Bethel Camping Centre (ṬBCC)-ah mi 680 vel enkawl mek an ni a, zu vanga enkawl ngai mi 60/70 vel niin, a bak mi 600 vel chu damdawi chi hrang hrang hman sual vanga enkawl an ni.

ṬBCC hotute chuan, tun hmaa YMA-in hma an lak tak tak anga hmalakna chu awm se tun ai hian enkawl ngai an tam an rin thu an sawi a, "Tuna enkawlte hi chu chhungte mangangin police leh tlawmngai pawl ṭhenkhat an rawn dahtir an ni a, tun hmaa YMA-in hma an lak ang kha chu ni se ṭhalai nun tam tak kan chhan chhuak ang," an ti.

Covid-19 avanga an inkhàr hnuah an inhawng leh ṭan tih sawiin ṬBCC hotute chuan, "Hmun hrang hrang aṭangin an rawn lut khawm leh ṭan mek niin kan hria. Zu vanga awm zingah hian kum upa lam an tam a, ruihhlo dang vanga awmte hi chu kum 45 hnuai lam an ni," an ti a, an enkawl zinga 100 vel chu hmeichhia an nih thu an sawi bawk.

Agape Home
Agape Home-ah seat 40 awmin, a khat vek a, a àwl hun nghâktu waiting list-a awm eng emaw zat an awm bawk.

Agagpe Home hotute chuan, heroin leh ganja vel vanga awmte chu kum 35 hnuai lam an nih thu an sawi a; zu vanga awm chu mi 10 vel an nih thu an sawi bawk.

LifCode
LifCode-ah hian kum 12-17 inkar mipa leh hmeichhia an enkawl a, heroin vanga enkawl ngai zingah hmeichhia aiin mipa an tam zawk.

LifCode hotute chuan, tunlaia heroin hluar avangin mipa bikah enkawl ngai an pung tih sawiin, "Chawhrualin kum 14 vel aṭangin heroin an ti ṭan a, enkawl tura rawn luh duh pawh an tam," an ti. Ruihhlo dang vanga enkawl ngai pawh an awm nual thu an sawi.