CM-in YMA Day a hmanpui

Nimina YMA Day lawmna ram hruaitute'n hmun hrang hrangah an hmanpui a, chief minister Zoramthanga chuan a bial chhunga Zemabawk leh Ṭhuampui Veng branch-te a hmanpui.

Chief Minister chuan, YMA nihna, ṭanpui ngaite ṭanpuitu tih chu thil ropui tak, ram dang mite lakah pawh chhuanawm a nih thu sawiin, "Inthununna nei ṭha hnam kan nihna tilang chiangtu pakhat a ni," a ti a; YMA hmalakna ropui tak chhunzawm zel thei turin hruaitute leh member-te duhsakna a hlân.

Zoramthanga chuan, YMA Day pualin khawtlang nun tichhetu, mi a nih tur ang ni thei loa siamtu zu leh ruihhlo laka fihlim tura intiam thar leh turin kal khawmte a sáwm a, "A bik takin ṭhalaite zu leh ruihhlo thlêmna laka fihlim zel turin ka duh a ni," a ti.

CM Zoramthanga hian chhun lamah Zemabawk Branch YMA-in Zemabawk H/S tuala an hmanna hmanpui a, zanah Ṭhuampui Branch YMA a hmanpui leh a ni.