YMA Day hlim taka lawm a ni

Nimin kha YMA Day vawi 88-na a ni a, Mizoram hmun hrang hrangah hlim taka lawm a ni. Central YMA president R Lalngheta chuan, Mizoram hmun hrang hranga YMA member, branch, group leh sub-headquarters-te chu mi harsa, chanhai, riangvaite ṭanpuitu an nih hre reng turin a chah.

Kumina YMA Day hi kum hnih chhung Covid-19 lêng vanga hman theih a nih loh hnua hman lehna hmasa a nih avangin YMA branch hrang hrangte'n uar takin an hmang a, YMA branch tam tak chuan YMA Day-ah chauh ni lo, a hma aṭang tawhin an hmang ṭan a; niminah phei chuan ruai nena lawm branch eng emaw zat an awm.

YMA Day-ah hian branch tam tak chuan zing karah khua/veng chhung tihfai hnatlang an nei a, chhun lamah infiamna leh intihhlimna hun an hmang tlangpui a, zanah vantlang inkhawm neiin, YMA kumpuan 'Ram leh hnam humhalh' tih hmangin infuih tharna hun an hmang a ni.

Central YMA hruaitute chuan insem darhin hmun hrang hrangah YMA Day an hmanpui a, president R Lalngheta chuan Dâpchhuah Branch leh Hlimen Branch-te a hmanpui.

Central YMA President chuan YMA Day thuchah a tichhuak a; YMA-in hma a sâwn mek tih sawiin, member-te chu ṭan la thar turin a sáwm a, "Mizoram hmun hrang hranga branch, group leh sub-headquarters-te kan huam chhungah mi harsa, chanhai, riangvaite ṭanpuitu kan nih hre reng ila, ṭanpui ngaite ṭanpui turin kan puanven i sawi chhíng ang u," a ti.

R Lalngheta chuan, ram leh hnam humhalh kawngah ṭan an la mek tih sawiin, "Kan hmalaknaah mi tinte min thláwp turin kan insáwm a. Hruaitute'n tih dik loh leh fel lote kan nei thei a, kan rorel leh hmalakna kawngah pawh tihsual leh tih dik loh kan neihna kawngahte intihmualpho leh eng emaw mai ni lo a, thuràwn min pe zawk turin kan sáwm che u," tiin, Mizo mipui a sáwm a ni.

YMA-in hnam inpumkhatna an ngai pawimawh tih sawiin, "Khawchhak lama kan Zo hnahthlak unaute, harsatna lian tak an ramah an tawh avanga lo tlân khawm mekte pawh theihtawpin kan ṭanpui a, YMA-in kan thawh khawm cheng nuai 50 chuang aṭangin nuai 43 chuang kan sem tawh," a ti a, a ṭul anga an la sem zel dawn thu a sawi.

Hemi rual hian CYMA President chuan, "Kan unau ṭhenkhat ráltlânte'n ruihhlo kan ramah min rawn pe a, heng hi kan mamawh lo a, Mizoramin a mamawh lo a, kan hnam chhiatna bul a ni," a ti a; tun hnuah chuan ti tawh lo turin Myanmar lam aṭanga rawn lutte a chah a ni.

Central YMA President chuan, Mizoram chhunga chhiat tâwkte ṭanpuina tur pawh YMA-in an thawh khawm mek a, cheng nuai 9 chuang a lut tawh tih sawiin, "A bo a bâng awm loin mi harsate puih nan YMA chuan a hmang dawn a ni," a ti a; YMA chu mi harsa leh chanhaite tana ding an nihna hre reng turin member-te a chah. YMA hruaitu mual liam tawhte an hriat reng thu a sawi bawk.

June 5, 1935-a Mizorama missio­nary sap ṭhenkhatte leh Mizo mithiam hmasa ṭhenkhatte Pi Zaii Bangla (tuna Synod Moderator quarters)-a inkâwm khawm chuan ṭhalai pawl din an rel a, a hming atan Rev. David Edward-a'n a rawt, Young Lushai Association (YLA) tih chu an pawm. YLA chu June 15, 1935-ah Nepali School-ah hawngin an din ta a, October 1947-ah Young Mizo Associa­tion (YMA) tiin a hming an thlak leh a ni.

Tun dinhmunah YMA-ah hian sub-headquarters pariat, group 50 leh branch 818 a awm. YMA member 4,69,709 chuang an awm mek a, mipa 2,79,246 leh hmeichhia 1,90,463 an ni.