Vocational training provider hnuaiah Mizo 2,936 zirtir an ni tawh
Labour Employment & Industrial Training (LEIT) department kaltlangin kum 2013 aṭanga 2015 chhung khan India ram hmun hrang hrang leh Mizoram hmun ṭhenkhata vocational training provider (VTP)-te hnena thiamthil chi hrang hrang mi 2,936 zirtir an ni tawh a; thiamthil zirtute zinga a tam zawk chuan an hlâwkpui a, eizawn nan an hmang niin LEIT department chuan a tarlang.
Vanglaini-in RTI Act hmanga a zawhna LEIT department SPIO-in a chhan danin, LEIT department kaltlanga VTP-a thiamthil zir tura Mizo ṭhalai tirh chhuah hmasak ber chu June 12, 2014-ah a ni a; Emporium Training & Consultancy Pvt. Ltd., Kolkata-ah tirh an ni.
VTP-a thiamthil zir tura thlan mi 2,936 zinga 1,319 chu Mizoram pawna institution hrang hrang 14- zir an ni a; a dang zawng chu Mizorama VTP 11-a zirte an ni.
VTP hnuaia training chhung hi a tlangpuiin a rei lo a, darkar zela chhût a ni. Training rei berna Advanced Plastic Processing Technology Centre (APPTC), Baleshwar, Orissa-ah chuan mi 49-in 'Plastic processing' an zir a, an training chhung hi darkar 1,200 a ni. Training chhung rei lo ber chu darkar 120 a ni a, IQST, Best First Step Education Pvt. Ltd., Guwahati, Assam-ah a ni.
'Mizo ṭhalaite'n VTP-a an thil zirte chu eizawnna atan an hmang ṭha em?' tih zawhna chu, 'Hriat theih chinah VTP-te aṭanga Mizo ṭhalai training chhuak, a tam zawkte chuan eizawn nan an hmang a, VTP-te aṭanga report dawn dan chuan, hna hmute hian Rs. 6,000 - 15,000 inkar hlawh an pe niin LEIT department chuan report a dawng," tiin an chháng.
'VTP-te hnena Mizo ṭhalai tirhte dinhmun enin, LEIT department hian hlawhtling a ti nge kalpui zel tlak loah a ngai?' tih zawhna pawh kalpui zel tlâka an ngaih thu an tarlang a; "SDIS hmanga Mizo ṭhalaite training-a tirh hi LEIT chuan hlâwk a ti a, he scheme aṭang hian kum 2015 thleng bâk training target leh fund a dawn tawh loh avangin training tirh hi a titawp a ni," a ti. Fund hmuh leh theih ni se chuan felfai zawka enkawla chhunzawm ṭha an tih thu an ziak bawk.
VTP-te hnena Mizo ṭhalaite thil zirtir an nih chungchangah hian Mizoram Youth Commission (MYC)-in hma a la ṭhin a, Mizoram pawna training turte thlan pawh MYC-in a buaipui ṭhin. VTP-tea Mizo ṭhalai training-te hi LEIT department-in an ngaihven zui ṭhin thu te, VTP-te enfiah ngai leh tlawh ngaite chu an tlawh ṭhin thu leh, VTP-te'n hna an hmuhsak em tihte pawh report an lak khawm ṭhin thu RTI chhannaah an tarlang.
Ministry of Skill Development Scheme kaltlanga ṭhalaite eizawnna kawng sialna atan Skill Development Initiative Scheme hnuaiah LEITY department hi state nodal department a ni.
Mizoram páwna thawn chhuah tawh zat
# VTP Training chhung Training zat An zir
1. Plastic Processing Centre, Baleshwar, Orrissa Darkar 1,200 Mi 49 Advanced Plastics Processing Technology
2. Ananda Spa Institute, Hyderabad Darkar 600 Mi 44 Spa & Wellness
3. De Unique Educational Society, New Delhi Darkar 500 Mi 114 ICT
4. Emporium Training & Consultancy, Kolkata Darkar 120-520 Mi 120 Hospitality, soft skills
5. IQST, Best first Step Education, Guwahati Darkar 120 Mi 12 Hospitality
6. LBIIHM, West Delhi Darkar 180-520 Mi 78 Hospitality, soft skills
7. Learn to Earn Services, Delhi Darkar 150-450 Mi 44 Banking, ICT, tourism, soft skills
8. Masti Health & Beauty, Hyderabad Darkar 180-544 Mi 401 Hospitality, spa & wellness, soft skills
9. MIE Educational, Gurgaon Darkar 180-544 Mi 109 Business & commerce, hospitality, ICT, soft skills
10. NIPS School of Hotel Manangement, Kolkata Darkar 120-520 Mi 45 Hospitality, soft skills
11. Optamaze Corporate Solutions, Kamrup, Assam Darkar 300 Mi 17 Security
12. PC Training Institute, Delhi Darkar 180-500 Mi 78 ICT, banking, soft skills
13. SBJ Centre of Excellence, Delhi Darkar 100-650 Mi 192 Beauty culture, spa & wellness, soft skills
14. VLCC Healthcare, Ghaziabad, UP Darkar 180-650 Mi 65 Beauty culture & hair dressing, soft skills
Mizoram chhunga zirtir zat
# VTP Training chhung Training zat An zir
1. CD Tailoring, Aizawl Darkar 520 Mi 37 Garment
2. C&M Computer Centre, E.Lungdar Darkar 500 Mi 28 ICT
3. Devine Computer Centre, Aizawl Darkar 500 Mi 231 ICT
4. Khawlhring Computer Institute, Aizawl Darkar 500 Mi 186 ICT
5. Lapaze Intech, Aizawl Darkar 600 Mi 51 Beauty culture, soft skills
6. Merge Computer Centre, Aizawl Darkar 500 Mi 182 ICT
7. Mizoram Agro & Allied Product, Aizawl Darkar 300-520 Mi 144 Medical & nursing, garmen making
8. Mizoram Computer Centre, Aizawl Darkar 500 Mi 300 ICT
9. Pizz Azz Bauty Salon, Aizawl Darkar 300-650 Mi 92 Beauty culture & hair dressing, soft skills
10. Social Justice & Development India, Aizawl Darkar 180-600 Mi 186 Spa & wellness, hospitality, soft skills
11. Zoram Arvy Comec Institute, Aizawl Darkar 120 Mi 131 ICT