MLA adopted school atan MoU ziak

Aizawl North-II bialtu MLA Dr Vanlalthlana chuan a biala Ramhlun Vengthar Primary School chu School Education department hriatpuinain adopted school atan a thlang a, adopted school a nihna anga hmalak zelna turah nimin khan memorandum of understanding (MoU) ziah a ni.

Adopted school hi Aizawl North-II Deve­lopment Society kal­tlanga hmalakna a ni a; MoU-ah hian Society aiawhin chairman Kap­thangvunga, Ramhlun Vengthar P/S aiawhin headmistress Lalhlimpuii Sailo leh khawtlang aiawhin YMA president Lalhmingmawia Zote ten hming an ziak a, Dr Vanlalthlana chu hriatpuituah a ṭang.

Project hi zirna tih­hmasawnna atana en­chhinna (pilot project) a ni a, adopted school mamawhte chu MLA fund aṭanga ngaihtuah ṭhin a ni dawn a, sikul enkawl zui hna chu Aizawl North-II Development Society-in consultant atana an hman Mizoram University-a professor pahnih kaihhruaina in kalpui a ni ang.

MLA chuan, zirnain hma a sawn theih nan te, mi harsa zawkte'n awlsam zawka zirna ṭha an dawn theihna atan leh sorkar sikulin hma a sawn theih nan Ramhlun Vengthar P/S hi MLA sikul chuam tura hmalak a nih thu a sawi a, "Mi tin thleng phaka hmalak hi ZPM ang pawha kan tum lian ber a ni," a ti.

Dr Vanlalthlana chuan, sikul chuam a neih theihna turin School Edu­­cation minister Lal­chhandama Ralte leh depart­ment hotute'n an phûrpui avangin lawmawm a tih thu a sawi a; Ramhlun Vengthar khawtlang hruaitute leh School Management Committee-te nen thawhhona ṭha an neih avangin a lawm thu a sawi bawk. MLA hian Ramhlun Vengthar P/S tan computer leh printer a pe nghal a ni.