'Zirna uar' video clip insiamsiakah Pakhatna - N. Vanlaiphai Rahsi Veng

Central YMA chuan YMA kumpuan, 'Zirna uar' thupuia hmanga video clip insiamsiak an buatsaih result nimin khan CYMA Hall-ah an puang a, North Vanlaiphai Rahsi Veng Branch chu pakhatna an ni.

CYMA Kumpuan Sub-Committee buatsaih 'Zirna uar' video clip insiamsiakah hian YMA branch 10 an tel a; pakhatna chu North Vanlaiphai Rahsi Veng branch an ni a, Kolasib Ṭumpui branch chu pahnihna niin, pathumna chu Ramhlun South Branch an ni. Pakhatnain Rs. 5,000, pa­hnihnain Rs. 3,000 leh pathum­nain Rs. 2,000 an dawng.

Result puanna inkhawm kaihruaitu Lalhmachhuana, CYMA vice president chuan, Covid-19 vangin tum angin YMA kumpuan bawhzui chak theih a ni lo a, inhriatthiam tlàn a ngaih thu a sawi a, "YMA member-te chu kan teirei peih tur a ni a, central service-a tling leh tur hian lehkha zir ngar ngar kan tam lo khawpin a hriat a, chuvangin, kan zavaia ṭan rual a ngai dawn. Kan kumpuan hian kut themthiamna (skill development) lam pawh a huam vek a, YMA member-te kan ṭan rual a ngai a ni," a ti.

CYMA president Van­lal­ruata chuan, YMAin kumpuanah 'Zirna uar' a lo neih tawh ṭhin thu sawiin, "Mihringte hi mi pangngaia min siamtu chu zirna hi a ni a, thiamna leh finna lam hawi zawnga kan kal loh chuan hnam ding chhuak leh puitling kan ni lo mai ang tih a hlauhawm hle. Hnam ropui, ram changkang zawkte ûm pha tur chuan zirna kan ngaih pawimawh a ngai," a ti a; 'Zirna uar' tih chu phûr taka kalpui a ngaih thu a sawi.