Chhiah hmuh tum zat 32%-in khûm 2021-22 chhiah hmuh zat vbc. 894.74

14th May, 2022

Taxation department chuan nimin khan an auditorium-ah kum 2021-22 chhunga sorkarin an sum lâk luh tur a ruahman, revenue target a bituk an hmuh kim lawmna an buatsaih a, Taxation minister Lalchamliana'n a hmanpui. Kum 2021-22 target chu cheng vbc 177.71-in khûm a ni a, khûmna hi 32% a ni.

Lalchamliana chuan, Taxation department-in kum 2021-22 target an khûm thei chu lawmawm a tih thu sawiin, "Pawl leh sorkar hi sum tel loin a kal thei lo a, hna a thawk thei lo. Mipui sum thawh tling khawm aṭangin sorkar a kal a ni," a ti a; chhiah pek chu mipuiin an mawhphurhna a ni tih an hriat telh telh avangin hma an sawn zel thu leh sorkar kum kal meka chhiah lak khawm tura bituk pawh khûm theih an beisei thu a sawi.

Tun hnai kum nga chhunga Taxation department sum hmuh zat a ṭhang nasa tih sawiin Minister chuan, "A bik takin GST-ah ṭhanna a sang hle a, profession tax erawh a tlahniam thung. Tax dik taka pek hlutna leh kan tih tur a nihzia mi tinin kan hriat a, ṭha taka kan zawm ṭheuh theih nan theihtawp i chhuah tlang zel ang u," a ti.

DCST & GST nodal officer C Vanlalchhuana chuan, Taxation department-in kum 2021-22 khan cheng vbc 20.23 an hman laiin cheng vbc 894.74 an hmu a, an hman ral chu investment a ni mah zawk tih a sawi a, “Saitual, Khawzawl leh Hnahthial district-ahte officer dah a nih chuan expenditure aia tam daih kan thawk chhuak dawn tihna a ni," a ti.

Sorkarin kum tin Taxation department chhiah lak khawm zat tur a bituk ṭhin a, kum 2021-22 chhunga target cheng vbc 717.13 a nih laiin, vbc. 894.74 an hmu a, target chu cheng vbc 177.71 (32%)-in an khûm a ni.

GST hman a nih hnuah kum nga chhunga ṭhanna khaikhawm chu 23.8% a ni a, kum 10 kal taa revenue collection aṭanga tehin kum 2021-22 chhunga hmuh chu 384%-in a tam zawk.

Taxation department hian chhiah chi thum - GST, Mizoram Value Added Tax (MVAT) leh Profession Tax a la ṭhin a; kum 2021-22 bikah GST cheng vbc. 731.55, MVAT cheng vbc. 148.83, Professional Tax leh chhiah dangah cheng vbc. 14.36 an hmu a ni.