Lockdown 6.0 chu nizan zanlai khan a tàwp a, nizan zanlai aṭang vek khan inkharkhip thawh sarihna (Lockdown 7.0) kalpui ṭan a ni.

June 8, 2020 zanlai aṭanga kalpui ṭan, khauh zawka inkhàrkhip Lockdown 6.0 chu nizan zanlai khan a tàwp a, nizan zanlai aṭang vek khan inkharkhip thawh sarihna (Lockdown 7.0) kalpui ṭan a ni. Lockdown 5.0-ah kalphung thlahdul deuh a ni a, chutih laiin, Mizoramah phai aṭanga lo hawte zingah Covid-19 an kai hmuh chhuah belh zel a nih avangin Chief Minister hoa sorkar hotute leh pawl hrang hrangte June 8-a ṭhukhawm chuan, khauh zawka June 8 zanlai aṭanga inkharkhip leh an rêl a ni. Khauh zawka inkharkhip kalpui ṭan a nihin police-te an duty uluk hle a, páwn chhuak pawh an tlem hle. Hun a rei a, páwn chhuak an tam telh telh a, police lam pawhin lirthei veivâkte an endik mumal lo telh telh a, niminah chuan Aizawla hmun ṭhenkhatah traffic a jam leh tawh a ni.

(Thlalak hun - June 22 (chhun dar 12:04); a hmun - Aizawl Civil Hospital thlang)