KṬP General Conference 2022 a ṭiak

KṬP General Conference vawi 59-na, May 5, Ningani zana ṭan chu nizan khan a ṭiak. Kum 2023-24 chhunga KṬP kumpuan thupui atan 'Ṭawngṭai tam' tih an thlang a, Youth Recreation Centre (YRC) pualin KṬP member-te pawisa thawhtir a ni tawh dawn lo.

KṬP inkhawmpuiah hian May 7, Inrinni chhun khan Ṭumpui Kohhran biak-inah rorel inkhawm neih a ni a, rorel palai 1,073 telin, Central KṬP leader Rev. Vanlalmuanpuia Khiangte-in a kaihruai.

Rorelnaah hian, KṬP YRC atan thawhlawm thawh leh an rél a, KṬP member tinte thawh zat tur bituk tawh loin, bial KṬP tinah sum thawh tur budget tuk tawh turin an rél. Kohhran humhalh chungchangah zirtirna buatsaih ni se, an ti.

Kum 2026-a General Conference neihna atan Saitual an thlang a, kum 2024 General Conference neihna tur Ngopa chu kum 2020 khan thlan a lo ni tawh. Kum 2022-23 budget atan Rs 66,10,000 an pawm a; kum 2022-24 chhunga Central KṬP hruaitu tur mi 25 an thlang chhuak bawk.

General Conference-ah hian Zirtawpni chhun khan KṬP report hrang hrang pek a ni a, zan inkhawmah Synod executive secretary (i/c KṬP) Rev.Dr K Lallawmzuala'n thuchah a sawi.

Report-a a lan danin, kum 2021 chhunga KṬP branch 891-te sum thawh chhuah belh khawm chu Rs 26,62,95,467 a ni a; KṬP member missionary-a chhuak mek 1,004 an awm a, chu'ng zinga 48 chu kum 2021 chhunga chhuak an ni.

Inrinnia rorel inkhawm hlanin chawhma lamah palai náwlpui tan biak-in pathumah multiplex programme neih a ni a, chawhnuah variety programme hman a ni. Inrinni zan aṭangin speaker Rev. Chuauṭhuama'n thupui 'Tunlai thil awmzia' tih sawi ṭanin, nimin chawhma leh chawhnuah a sawi leh a ni.

Nizana inkhawmah CKṬP Leader kal chhuak turìn thuchah a sawi a, kum 2022-24 chhunga CKṬP hruaitu turte Pathian hnena hlanna hun hman a ni. Inkhawm bân apiangin inpâwlhona (fellowship) neih ṭhin a ni bawk.

General Conference-ah hian hriat theih chinah palai inziak lut chu mi 9,015 an ni a, inziak lut lo ṭhahnem tak an awm bakah, nimina lehlanga kal eng emaw zat an awm a; nimin chawhmaa inkhawm zat chu mi 24,239 an ni.

KṬP General Conference hi Kolasib khawpuia pastor bial pathumin an thleng a, inkhawmpui thlenna atana sum an ruahman zat chu Rs 72,87,400 niin, kohhran leh KṬP branch hrang hrangte thawh khawm leh Central KṬP aṭanga an hmuhte a ni a, sorkar aṭangin suma puihna an dawng lo.