March ral hmaa insawn tur ti

Thorang Wildlife Sanctuary zauhna atana, Dar­ngawn leh Kawnpui West khuaa chhungkaw 145 sawn chhuah turte chu March, 2016 ral hmaa insawn chhuak vek tura tih an ni.

Thudawn danin, Dar­ngawn leh Kawnpui West khuaa chhungkaw 145-te hi zangnadawmna cheng nuai 10 ṭheuh pek an ni tawh a, heng mite hi a rang thei ang bera insawn chhuak tura tih ni mah se, Krismas leh kumthar vuakvetin a nan avang leh naupang sikul kai hun a laklawh avangin an la insawn chhuak thei rih lo. An harsatna hi sorkar chuan hriatthiampuiin, kumin March thla tawp thleng hun a pawhseisak a ni.

Thorang Wildlife Sanctuary zauhna atan hian Krismas hma khan Union Home Ministry aṭangin cheng nuai 1,044 hmuh a ni. Khaw sawn chhuah tur pahnih, Darngawn leh Kawnpui West khaw mipuite chu duhthlan tur pahnih siamsakin, an duhna hmun hmuna pema, cheng nuai 10 dawng tur emaw, a hranpaa khaw thar dinsak emaw tura thurawn pek an ni.

Khaw mipuite hian an duhna hmuna pema cheng nuai 10 dawn an thlan zawk avangin an duh ang hian chhungkaw 145 chu cheng nuai 10 theuh pek an ni tawh.

Thudawn danin, Mizoramah nungcha hrang hrang a chereu loh nan an chenna tur ram ngaw zau zawk buatsaih turin sorkar chuan tan a la mek a, he mi atan hian Thorang Wildlife Sanctuary hi zauh tum a ni.

Thorang bakah hian Wildlife Sanctuary dang-te pawh a tahtawla zauh chhoh zel tum a ni a, Dampa Tiger Reserve Sanctuary pawh zauh tur a nih avangin a zauhna atan hian Serhmun khua pawh sawn a la ngai dawn a ni.