Pasal atan hnam dang nei lo turin CYMA President-in Mizo nulate a ngen

Central YMA president R Lalngheta chuan, hnam dang nena inneih pawlh chu Mizo hnam chîmralna hmanrua pakhat a nia sawiin, Mizo nulate chu pasal atan hnam dang nei lo turin a ngen.

Nimina Bilkhawthlir Joint YMA-in YMA kumpuan 'Ram leh hnam humhalh' hawnna inkhawm an buatsaihah thu sawiin R Lalngheta chuan, ram leh hnam humhalh turin chîmrala awm loh a pawimawh thu a sawi a, "Nupui pasal inneih pawlh kawngah fimkhur a pawimawh a, inneih pawlh hi kan hnam chimralna hmanrua pakhat a ni. Mizo nulate chu pasal atan hnam dang nei lo turin ka ngen a ni," a ti.

In luah chungchangah, hnam dangin an ngam to zawk vanga luahtir mai loin mahni hnampui ngei luahtir turin CYMA President chuan Mizo mipui a ngen a; Mizoramah hnam dang dan loa sumdawng an tam tih sawiin, "Sum tlemtê avanga mahni hming hawhtir hreh lo kan awm zel hi a pawi hle," a ti a, sum hmuh vang ringawta hnam dang dawr, mahni dawr anga lo chhàl ve ngawt chu hnam hralhna a nih thu a sawi.

R Lalngheta chuan, zirna chu ram leh hnam humhalhna kawnga pawimawh berte zinga mi a nih thu a sawi a, "Ram leh hnam humhalh tur chuan thiamna kan neih a ngai. Zirna hi keimahni tan mai a ni lo a, ram leh hnam tana zir kan ni tih kan hriat a pawimawh," a ti.

CYMA President chuan, ruihhlo hian nasa takin ram a tichhia a, ṭhalai duhawm tak takte hman tlak lohin an chhuak mek tih sawiin, ruihhlo ti ṭhin inchhîr lo an la awm loh avangin ṭhalaite chu ti chhin lo turin a chah a; mithiamte'n hnam ral zia an tih, mipat hmeichhiatna kawngah Mizo ṭhalaite an tlân nasat thu a sawi.

Ngaihsan tur dik ngaihsan a hun tawh tih sawiin R Lalngheta chuan, "Ram dang tih dan ngaisang rêng rênga hun hmang loin, Mizorama ngaihsan tlâkte hi i ngaisang ang u. Kut tling loa sum la lutte hnualsuat ngam ila, an hnen aṭangin Pathian ram pawh i dawng lo ngam ang u," a ti.

Bilkhawthlir Joint YMA secretary PB Lalramnghaka tarlan danin, Bilkhawthlirah April 9, 1947 khan YMA a ding ṭan a, tunah branch panga a awm mek. Kumpuan hawnna inkhawm hi Joint YMA president K Biakzuala'n a kaihruai a ni.