Book of the Year lawmman hlan a ni

Mizo Academy of Letters (MAL) chuan nimin khan Assembly Annexe conference hall-ah an din champha lawmna hun an hmang a, Book of the Year 2021 atana an thlan 'Hnam ropuite u, tho r'u le' tih ziaktu Lalhruaitluanga Chawngte hnenah khuallian chief minister Zoramthanga'n chawimawina leh lawmman a hlân.

MAL din champha lawmna hi an president Prof. RL Thanmawia'n a kaihruai a; Book of the Year 2021 dawngtu Lalhruaitluanga Chawngte chuan, lehkhabu ṭha ber lawmman a dawng chu lawmawm a tih tak zet thu a sawi rualin, phú lo a intih thu leh a inthlahrun thu a sawi.

Inkhawmah hian CM Zoram­thanga'n MAL website thar https://mizoacademyofletters.c... a tlangzarh a; khualzahawm Lalrinliana Sailo, Assembly speaker-in lehkhabu pathum - Lalaudinga ziah 'Khawvel Indopui Pahnihna' tih te, B Lalthangliana ziah 'Mizo hla leh a phuahtute' tih leh, Lalthangfala Sailo ziah 'Mizo nunhluia lemchan pathum' tihte a tlangzarh bawk.

Chief Minister chuan, ṭawng a pawimawh tak zet tih sawiin, "Ṭawng hi khawvel hnehna a ni," a ti a; thil rêng rêngah a chhe lam aiin a ṭha lam tarlan tam a pawimawh thu sawiin, "Kan chhiatna ziah tam aiin kan ṭhatna ziah tam hi kan hmasawnna tur, ràltiang kan kài vena tur a ni... A sual eng emaw zat karah mi ṭha, mi fel kan la ngah. A ṭha lai hmang thiam hi kan vannei a ni mai," a ti.

Book of the Year 2021 Commi­ttee secretary Lalzarzova tarlan danin, kum 2021 chhunga Mizo ir-áwm chhuak lehkhabu ṭha ber thlannaah hian lehkhabu 170 endik a ni a, tehna hrang hrang hmanga endik a nih hnuah 'Hnam ropuite u, tho r'u le' tih chu thlan a ni. Lalhruaitluanga Chawngte hian Book of the Year lawmman vawi hnih a dawnna a ni a, kum 2016 khan 'Aizawlah Aizawler' tih hmangin a lo dawng tawh a ni.

MAL hian kum 1989 aṭangin Book of the Year a thlang a, kum tin thlang zuiin, Book of the Year 2021 hi a ṭum 33-na a ni. Book of the Year hi mimal 27 leh pawl pakhatin an dawng tawh a, vawi hnih dawng mi panga- B Lalthangliana, C Laizawna, Lalhriata, C Lalnunchanga leh Lalhruaitluanga Chawngte-te an awm.

Book of the Year dawngtu zingah hmeichhia pathum an tel tawh a; Book of the Year atana thlan hlawh ber chu thawnthu (novel) niin, novel 17 thlan a ni tawh a, lemchan (drama) vawi khat, article/essay chilh khawm bu vawi sarih, history lam hawi vawi thum, ramfan bu (travelogue) vawi khat, critical writing vawi hnih thlan a ni tawh bawk.