Hmun 2-a chetsualnaah ṭhalai 4 an thi

December 14, Zirtawpni khan Serlui-A Hydel Project bula chet­sualnaah tlangval pahnih an thi a; zan dar 10 vela Durtlang North-a chet­sualnaah ṭhalai pahnih an ni tawh.

Tuikhuahtlang YMA hruaitute sawi danin, Tuikhuahtlang basket­ball player mi 11-te chu Reiek kawng bula Serlui-A Hydel Project bulah intihhlimna neiin lí-ah an chêng a ni. K Lalhluzuala (21) s/o K Lalzarliana leh Lalrintluanga Tlau (18) s/o Remsangzuala Tlau-te chuan Serlui lí an hleuh a, K Lalhluzuala chuan a hleuh chhuak tawh a, Lalrintluanga chu li laiah a tâl buai avangin chhan tumin a lut leh a, tuiah an tla dun ta a ni.

K Lalhluzuala leh Lalrintluanga te ruang hi Zirtawpni zan tir lamah hmuh ve ve a ni a, Inrinni khan vui an ni.

December 14, Zir­tawpni zan dar 10 pelh tawhah khan Durtlang North-a ICFAI Univer­sity bula leivûng paih­na khâmah Lucy Lal­muanpuii (22) d/o Lal­­chhuanawma leh, Zodin­sanga (20) d/o Lal­lawmzuala, Armed Veng South ve vete an tla hlum.

Bawngkawn Police Station hotute sawi danin, Lucy Lalmuanpuii hian a ṭhiante nen a pian champha an lawm a, zan lamah an léng khawthawng a; ICFAI University bula an ṭhutkhawm hnua an kal leh dawnaa zunram thiar tura an kalna lamah leivûng paihna khamah an tla palh ta a ni.

An tlakna khâm hi meter 500 vela sang nia sawi a ni a, Zirtawpni zan zanlai pelh hnuah an ruang lak chhuah niin, Inrinni khan vui an ni.