Covid-19 vei hmuh thar zinga 83.22% District khawpui páwn lama mi an ni

April 11, Thawhṭanni khan Mizoramah Covid-19 vei mi 149 hmuh chhuah a ni a, an zinga 83.22% chu district khawpui páwn lama mite an ni. Nimin khan hripui vei dam tawh mi 194 chhuahtir an ni a, Covid-19 vei thi an awm lo.

Covid-19 vei hmuh thar mi 149-te chu mipa 79 leh hmeichhia 70 an ni a; RAT hmanga hmuh 147 leh FIA hmanga hmuh pahnih niin, sample endik aṭanga hripui vei hmuh zat (positivity rate) chu 12.70% a ni.

Thawhṭannia hripui vei hmuh chhuah mi 149 zingah district khawpuia cheng mi 25 chiah an awm a, a bâk mi 124 (83.22%) chu district khawpui páwn lama mite an ni. District khawpuia chêng positive hmuh thar mi 25 zinga Aizawl khawpuia chêng mi pariat chiah an tel.

April 11 khan India ramah Covid-19 positive mi 796 hmuh niin, chuta ṭang chuan Mizorama hmuh zat 149 chu 18.72% a tling a, Mizoram aia hmuh chhuah tamna Kerala (mi 196) chiah a awm.

Hmarchhak state pariatah Covid-19 positive mi 157 hmuh chhuah a ni a, chu'ng zinga mi 149 chu Mizorama hmuh niin, 94.90% a tling a; Manipur-ah mi paruk, Arunachal Pradesh leh Assam-ah mi pakhat ve ve hmuh niin, Meghalaya, Nagaland, Sikkim leh Tripura-ah positive hmuh a ni lo.

IDSP record angin, Mizoramah Covid-19 vei 2,25,732 hmuh chhuah a ni tawh a, mipa 1,05,194 leh hmeichhia 1,20,538 an ni a, mipa aiin hmeichhia 15,344-in an tam zawk. Nimin tlai dar 5 thleng khan mi 2,24,409 (99.41%) chhuahtir an ni tawh a, mi 689 (0.31%) thi tawhin, enkawl mek mi 634 (0.28%) an awm.

Nimin tlai dar 5 dinhmun angin, Mizorama district 11 zingah Kolasib, Siaha leh Lawngtlai district-ah Covid-19 vei enkawl lai 10 an tling tawh lo a; Lunglei, Serchhip leh Mamit district-ah 100 aiin an la tam thung.

Nimin chawhma lam dinhmun angin, Tripura, Puducherry, Lakshadweep leh Dadra and Nagar Haveli and Daman and Diu-ahte Covid-19 vei an awm tawh lo.