PHE department laboratory-a tui endikah Natna khirhkhân thlen thei hmuh a la ni lo

Public Health Engineering (PHE) department hnuaia mihring hman tur tui thianghlim leh thianghlim loh endiktu, State Referral Institute (SRI), Tuikhuahtlang chuan a din tirh kum 1988 aṭanga kumin 2018 thlengin an laboratory-a tui an enfiahnaah mihring tana natna khirhkhân bik thlen thei an la hmu chhuak lo.

Central norms-in a phût angin SRI hi thla khata vawi khat tal tui endik tir tur a nih laiin, tui endik tur petu tur village council-te'n an tlin lo hle a, kum khatah vawi li endiktírte chu a ti ṭha pawl an ni. Sorkar kum kal meka tui endik tir tam ber chu Sihphir khua an ni a, vawi 21 an endiktir tawh.

SRI laboratory hotute chuan, Mizorama tuite chu mipuite in atan a him leh him loh endikna chi hrang hrang chi kua hmangin an endik ṭhin a, tui an endikte chu tuikhura mi te, ram hnuai leh luia mi tui lâk leh hand pump hmanga lak chhuah leh ruahtuite a ni. Tuite chu V/C-ten an pek te, a sample la khawmtute'n an lak khawm te, water supply scheme nei khuate'n an pekte a ni hlawm. Tuihri lêng vanga damlo an awmin, an tui tlante a hmunah an endik ṭhin bawk.

SRI hotute chuan, "Kum 30 chhungin tui kan endikah mihring tana natna hlauhawm bik, cancer thlen thei te, ruh tichhe thei leh ha tichhe thei (chemical characteristic) ang chi kan la hmu lo," an ti a; tui thianghlim tâwk lo erawh a awm ve ṭhin a, chu'ngte chu damdawi hmangin natna hrik an thahsak ṭhin thu an sawi.

Thingtlang khaw ṭhenkhatah tuihri lêng leh tui in vanga natna awm an zir chian tawhnaah, tuikhur hnaiah ê-kin, vawk-in, zun-inte a awm vang a nih thu sawiin SRI hotute chuan, "Tui lâkna aṭanga ft. 3 velah vawk-in a awm a, kan enfiah hnuah chu tuiah chuan bacteria kan hmu chhuak. An vawk-in chu kan ṭhiahtir nghal a ni," an ti.

SRI hotute sawi danin, khaw pakhatah tuihri a lêng a, damdawi-inah naupang eng emaw zat an awm avangin khawtlang hotute'n an pun a; a hmuna an zir chian hnuah, silpauline hmanga khawtlangin tui an khuahah naupang an cheng ṭhin a, chu chu motor-in chawiin, khaw chhungah an hralh leh ṭhin vang a ni.

Central norms ang chuan, tuikhur, tui pump, tuahtui, etc. te chu thla khatah vawi khat zel laboratory-ah enfiah tur a ni a; mahse, V/C-te'n an khua ṭheuha tuikhura mi leh tui lakte endik turin SRI-ah an ken ngai loh avangin SRI chuan thla tin an endik sak ngai lo. Kum khata vawi li dah theite chu a ti ṭha pawl an ni. Aizawl district bikah khaw 89 awmin, tui endikna result a ṭhat avangin kum kal laiah hri lêng a awm an hre lo.

SRI-ah hian Thawhṭanni aṭanga Nilaini thlengin tuiah bacteria a awm leh awm loh an endik ṭhin a, thil dangte chu ni tin an en thei thung. Bacteria bik endik tur chuan, tui chu bûr faiah thun a, darkar 2 chhungin Tuikhuahtlanga SRI laboratory thlenpui hman a ngai. Aizawl district-ah laboratory pali - Aizawl, Saitual, Darlawn leh Sakawrdaiahte a awm.

Aizawl district-ah khaw 89 a awm a, kuminah Tuikhuahtlanga SRI labroratory-ah hian khaw 48-in tui an enfiahtir tawh. Sihphir chu tui endiktir ngun ber an ni a; anni bakah, chhimphei tlangdung khaw hrang hrangte chu endiktir taima zual deuhte an ni.