Dan lo leh Mizo hming hawha sumdawng an awm loh nan YMA leh LC/VC ṭang dawn

16th March, 2022

Central YMA bultumin nimin khan CYMA Committee Room-ah sorkar department leh páwl hrang hrang aiawhte'n Mizo hming hawha hnam dang sumdawngte chungchang leh gas tihchingpen chungchang an sawiho a; dan lo leh Mizo hming hawha hnam dang sumdawng an awm lohna turin YMA leh LC/VC-te'n hma an la dawn.

CYMA president R Lalngheta chuan, gas tihchingpen a reh theihna turin YMA-in an bei nasa tawh tih sawiin, "Tunah hian gas a zâng leh tawh a, a phái a tam khawp mai. Hei hi kan ram economy nghawng thei a nih avangin a pawimawh tak zet a, tireh turin dan hnuaiah sorkar aiawhte nen chak zawka hmalak dan tur ngaihtuah a ngai," a ti.

R Lalngheta chuan, gas tihchingpen vèn chu YMA tih tur a ni lo tih sawiin, "Ram leh hnam tan a ni si a, kan ti ve mawp mawp a ni. Kan chanvo dik tak chang turin ṭan kan lak ṭan a ngai. Tui fîm hman hram kan tum ang a, a daih ngang loh chuan ram leh hnam tan tui nú pawh kan hmang mai ang," a ti a, tui nu hman ngai lo tura ṭan tlan an duh thu a sawi.

CYMA Kumpuan Committee chairman Lalhmachhuana, CYMA vice president chuan, Police leh Legal Metrology lamin indaih lo an tih zel thu sawiin, "Engtin nge gas tihchingpen hi kan tih reh theih ang a, eng nge a kaikuang tihte ngaihtuah ho a ni. Ram leh hnam tan heng system dik lo tak hi kan tireh thei dawn lo'm ni," a ti.

Ṭhutkhawmah hian Aizawl City Local Council Association, Village Council Association, FCSCA department, Legal Metrology, Aizawl SP, Aizawl DC leh gas agency aiawhte an tel a ni.

ṬHUTKHAWMA RESOLUTION SIAMTE
1) LPG hi distributor-te'n an dàwn veleh veng chhung point-a sem chhuah a nih hmain an bûk tur a ni a, bûk tlingte chauh mipui hnenah sem chhuakin, bûk tling lote chu company-ah thawn lêt tur a ni.
2) Gas an bûk ngei tih hriatpui turin LC, VC, YMA, Legal Metrology leh Police-te a bûkna hmuna an awm ngei theih nan hriattir ṭhin tur.
3) Dan loa vai sumdawng leh Mizo hming hawha sumdawng an awm lohna turin YMA, LC, VC ten theihtawp chhuaha mahni area ṭheuhah a remchan dana thawkhoin ṭan lak nise.