AMC Licensing Regulation 2012-ah Mizo hnam himna tur a awm lo - MIMA

Mizoram Merchant Association (MIMA) chuan, Aizawl Municipal Corporation dan siam, AMC Licensing Regulations, 2012 chu ngun taka an zir chian nawn hnuah Mizo hnam himna tura siamṭhat a la awm loh thu an tarlang.

MIMA chuan, AMC Licensing Regulations, 2012-in document a phûtte chu - Electoral Photo Identity Card (EPIC), residential certificate, in neitu phalna, passport size photo pali leh local council aṭangin no objection certificate (NOC)-te a la nih reng thu an tarlang a, "Heng document-te hi hnam dang tan neih harsa a awm lo. EPIC leh residential certificate-te hi Mizoram tih a ni si lo a, India rama state dang khawi hmun pawh a hman theih vek a ni," a ti.

Covid-19 lên hmain hnam dang tam tak AMC Licensing Regulation hnuaiah ziah luh tawh an ni tih an hmuh chhuah thu tarlangin MIMA chuan, "Hetiang a nih avang hian AMC-a sumdawngte inziah luh chungchangah hian kan dinna ngaiah kan la ding reng a, sumdawngte AMC-ah registration tih rih loh tur a ni," an ti a; Mizo hnam himna turin AMC chu sumdawngte registration tih luihtir lo turin an ngen a ni.