Pawngsualtu kum 18 táng turin hrem

Hmeichhe naupang kum 12 pawngsualtu Lalsangzela (22) s/o Lalrosiama, Ngur khua, Champhai district chu Champhai District Special Court-a judge R Vanlalena chuan kum 18 chhung jail-a táng tur leh Rs. 10,000 chawi turin a hrem.

Champhai Police aṭanga thu dawn danin, January 1, 2017 zan dar 10 vel khan Lalsangzela (22) chu mi inah a ṭhianpa nen zu rûi chungin an lut a, bedroom-a hmeichhe tleirawl muhil lai chu a ká hupsakin a pawngsual a ni. Chhungkaw nu ber zung tura tho chuan an fanu chhuata a unaute nena mu chu a ṭap ri a hria a, a fanu blanket sin lai a hlim chuan, Lalsangzela'n an fanu chu a pawngsual tih a hmu a ni.

Lalsangzela chu a tlan chhuak nghal a, a ṭhianpa erawh tapchhak bulah a lo ṭhu a, engmah a tih ve lo thu a sawi. Minute 10 hnu velah Lalsangzela chu kîr lehin ngaihdam a dil. He thil thlen zan la la hian vanduaina tawktu chhungkuate chuan an khaw V/C leh YMA hruaitute an hrilh nghal a ni. A tûkah Lalsangzela chu ramhnuaiah a biru a, tlai dar 4 velah a patea bulah kalin police hnena hlan turin a ngen a ni.

Hmeichhe naupang hi Champhai District Hospital-ah hruai niin, pawngsual a ni ngei tih finfiah a ni. Champhai District Court-a Special Judge chuan, police-te thil chhuina leh thuhretu hrang hrangte thusawi a zir chian hnuah November 14 khan thuremna a tichhuak a, Lalsangzela chu kum 18 chhung jail-a táng tur leh Rs. 10,000 chawi turin a hrem ta a ni.