CM-in economic molecule a sawifiah ; 'Kan economic molecule pawimawh tak chu mau a ni' - Chief Minister

Chief minister Zoramthanga chuan nimin khan ZPM member C Lalsawivunga zawhna ziaka chhángin, economic molecule a sawifiah a, "Kan economic molecule pawimawh tak chu mau a ni," a ti.

CM Zoramthanga chuan, economic molecule chu Mizoram economy tihhmasawnna atana thil ṭangkai leh mamawh, ramin a neih sate leh hmasawnna ruhrel sawina a nih thu sawiin, "Mizoramin mau tam tak kan nei a, kan ram leilung, sik leh sá hi mau ṭhan nan a ṭha hle," a ti a; mau leh leilung, sik leh sáte chu Mizoram economic molecule pakhat a nih theih thu a sawi a ni.

Chief Minister chuan, ram hmasawnna ruhrel - kawng, kawlphetha, tui leh thil dangte leh human resource-te pawh economic molecule pawimawh a nih thu a sawi.

Economic molecule tihnun dan tur zawhna chhangin CM Zorama chuan, "Sorkar, khawtlang leh mimal tinte'n kan tih tur chanpual ṭheuh thawhhona ṭha tak hnuaia theihtawp kan chhuah hian he economic molecule-te hi ram hmasawnna atan kan activate ang," a ti.

Chief Minister chuan, Mizoramin hausakna a neihte hmang ṭangkai turin kawng hrang hrangin hmalak mek a nih thu sawiin, "Mimal leh khawtlangin an hma ṭheuhah theihtawpin hma an la mek," a ti a, sorkar pawhin department hrang hrang kaltlangin hma a lak mek thu a tarlang.

Economic molecule pawimawh tak chu mau a nih thu sawiin Zoramthanga chuan, "Lian tham zawka kan rama mau kan hman ṭangkai theihna atan kan mamawh chu link road a ni. Link road kan neih theihna atan sorkarin theihtawpin concept paper-te buatsaihin hma a la a, tichuan, a vawi khatna atan bamboo link road scheme sorkar laipuiin PMDevINE hnuaiah cheng vbc. 100 a pawm a ni," a ti.