Inthlan dawnah contract leh sorkar hna pe tura intiam rem kan ti lo- MPF

Mizoram People Forum (MPF) chuan, inthlanah tlin duh vanga thil intiam an remtih loh thu an sawi a, "Contract leh sorkar hna intiamte pawh rem kan ti lo," an ti.

MPF hruaitute hian nimin khan Aizawl Press Club-ah thuthar thehdarhtute an kâwm a; MPF vice president Rev. B Sangthanga chuan, inthlanpui neih dawnah MPF chuan political party-te nen Thawhhona Thuthlung an siam ṭhin thu sawiin "Political party-te nen kan thawhhona a ṭhat avangin inthlanna thianghlim leh felfai a awm theih ṭhin phah," a ti a, kumin MLA inthlanah pawh political party leh MPF-te'n Thawhhona Thuthlung an siam leh tih a sawi.

Rev. B Sangthanga chuan, thawhhona thuthlung siam turin political party-te nen ṭum eng emaw zat an inhmuh khawm thu sawiin, "Uluk takin thawhhona tur kan duang a ni. MPF duh dan ngawt a ni lo a, kan ram tana ṭha tur ngaihtuahin, Election Commission of India-in dan a neihte ráwn chhungin kan siam a, chumi hnuah political party-te'n an remti tlang a, an President-te ṭheuhin hming an ziah hnan a ni," a ti.

MPF Vice President chuan, MPF chuan house to house campaign neih loh tawp ṭha an tih thu a sawi rualin, "Political party lam nawrna avangin local forum kaihhruaina hnuaiah house to house neih hi candidate tan chuan kan remti a ni," a ti a; house to house campaign chu party worker-te tan phal a nih loh thu a sawi.

MPF general secretary Rev. R Lalbiak­mawia chuan, inthlanah helte hmaruaa hman phal a ni lo tih sawiin, "Kan Thawhhona Thuthlungah chuan 'Helte hmanruaa hman leh ralthuam chelekna awm theite huai taka dodal ṭheuh tur a ni' tih a ni. Hetiang a nih avangin tumahin helte hmanruaah hman loh tur a ni a, Election dan pawhin a phal lo. Invau leh intihṭhaihte tih hauh loh tur a ni a, hetiang hi a thlen lohna atan theihtawpin ṭan kan la ṭheuh dawn nia," a ti.

Candidate intiamtir chungchang sawiin MPF hruaitute chuan, "Kan Thawhhona Thuthlungah chuan, 'Mipui, pawl hrang hrang leh kohhrante pawhin party leh candidate-te hnenah thil phût neih tur a ni lo' tih a ni," an ti a; mipuite pawh candidate-te thil tiamtir lo turin an ngen.

MPF hruaitute chuan, jersey, football, mobile phone handset leh a dangte pawh candidate hnenah dil emaw, candidate-in an sem chu election danin a phal loh avangin tih hauh lo tur a nih thu sawiin, "Sorkar hna leh contract intiamte hi rem kan ti lo. A taka thleng thei lo tur chi intiam phei chu a ṭha lo. Tihhlawhtlin leh si loin a buaithlak thei," an ti.

MPF hruaitute chuan social media hman fimkhur a ṭul thu sawiin, "Social media hmanga dik lo taka thu thehdarh hi sorkar danin a phal loh avangin tih hauh loh tur a ni," an ti a; finfiahna awm si loin, tute emaw social media-a tihhmingchhiatna a awm ṭhin thu an sawi.

Vote lei leh hralh chungchang sawiin MPF hruaitute chuan, "Kan Thawhhona Thuthlung chuan, 'Sum leh therhlo dang hmanga vote lei leh hralh hi election danin a phal loh avangin tih hauh lo tur a ni' tih a ni. Hetiang a nih avangin mipuite pawhin kan vote hlu tak hi engti kawng pawhin kan hralh duh tur a ni lo. Hei hi dan bawhchhiatna a ni," an ti.