MP-in Tuivai lei dawh tur a enfiah

Rajya Sabha MP K Vanlalvena chuan nimin khan Mizoram leh Manipur inkalpawhna National Highway-150, Tipaimukh kawnga Tuivai luia thîr lei (bailey bridge) dawh thar tur a enfiah a, "Chief Minister kawng vei tlattu kan nei hi a lawmawm hle a ni," a ti.

K Vanlalvena chuan, Assam hoin an duh hun huna an dan pin theih loh kawng dang ngaihtuah chu hnam rilru aṭang pawhin ngaih pawimawh a ṭul tih a sawi a, "Tuivai lei hi a taka hman theih a nih hunah chuan ṭhenawm state-a kan Zo hnahthlak unaute nen pawh inpawhna thûk zawk kan neih ngei ka beisei," tiin a sawi.

Rajya Sabha MP chuan, March 3, 2019 khan Tuivai lei dawh nan cheng vbc. 8.16 sanction a nih thu sawiin, "Tender koh ṭhin niin, chhángtu an awm ngai lo," a ti a; tender vawi thum koh a nih hnuah Sastrik Contruction-in 26%-a sanga an chhan avangin thlan an nih loh thu te, estimate dang siamin DPR cheng vbc 11 vel siam a nih thu te, Ministry of Road Transport & Highway-ah thehluh a nih tawh thute a sawi bawk.