MSU-in Kamrul-a an la hmu lo ; Guwahati-ah a awma hriat a ni

Mizo Students Union (MSU) chuan February 19, 2022 aṭang khan Kamrul Laskar Uddin, Ṭhuampui an zawng ṭan a, nimin thleng khan an la hmu lo. Hetih lai hian, Kamrul-a hi Guwahati-ah a awma hriat a ni.

MSU Gen. Hqrs hruaitute chuan February 19, Inrinni khan Kamrul Laskar awm ṭhinna veng Ṭhuampuiah an zawng a, Ṭhuampui Branch YMA-te'n an lo dawngsawng. Ṭhuampui YMA hruaitute chuan MSU hruaitute chu Kamrul-a in luah ṭhin nia hriatah an hruai a, mahse, in chu tala hmangin a inkalh a, hun rei tak hawn tawh loh nia ngaih theihin a lo awm.

Kamrul-a awmna ṭhin bul vela chengte chuan, kum hnih chhung vel an hmuh tawh loh thu an sawi.

MSU hruaitute chuan Inrinni vêk khan Kamrul-a chu bepawpin, Lengpuia a in luahah a awm thuin a lo chháng a; Lengpui MSU hruaitute'n Kamrul-a in luah ṭhin chu an thlithlai nghal a, Aizawla MSU hruaitute pawhin Lengpui an pan nghal bawk.

Kamrul-a chu Lengpuia a in luahah a awm lo a, a in luah pawh a inkalh. MSU hruaitute'n biak leh an tumin an bepawp thei tawh lo. Hetih lai hian, Kamrul-a hian Inrinni vêk khan Guwahati a pan nia hriat a ni.

Kamrul Laskar zawn hnatlang kaihruaitu Samuel Zoramthanpuia, MSU general secretary chuan, Mizo hnam himna atana inhung bikna zah lo taka vaw ṭhiattu Kamrul Laskar chu Mizoram pumah zawn zel a ni dawn tih a sawi a, "Hmuh a nih hma zawng Mizo dan angin ni sarih chhung MSU kaihhruainain zawn a ni ang," a ti.

Mizoram hmun hrang hrangah MSU kaihhruaiin Kamrul Laskar (Kamlova Chhangte inti) zawn mek a ni a, a awmna chin hriate chu MSU hruaitute hnenah hriattir turin an ngen a ni.

MSU chuan, Kamrul Laskar chu a tribal certificate Mizoram sorkarah pe kîr (surrender) turin an phût a, a surrender duh loh avang leh an biakpawh theih tâk loh avangin an zawng ta a ni.

Tarlan tawh angin, Kamrul-a (Kamlova Chhangte) hian a company KR Construction hmingin Mizoram sorkar hnuaiah contract eng emaw zat a thawk mek a, hna ṭhenkhat chu restricted tender hmanga a hmuhte a ni. Hna thawh hmabak pawh a nei nual.