CM-in Dawrpui Multipurpose Centre a hawng

Aizawl Civil Hospital bul, Dawrpui Pìpu Tlanga Dawrpui Multi Level Parking, Community Centre and Office Com­plex (Multipurpose Centre) chu nimin khan chief minister Lal Than­hawla'n a hawng.

Chief Minister chuan, Dawrpui Veng mipuite mamawhna phuhrûk tur mai ni lo, Zoram mipui tam zawk pawhin an chhawr tur multipurpose centre hawn a ni chu lawmawm a tih thu sawiin, "Aizawl khawpui lûn lai bera lirthei dahna awm tlem vanga kawngpui tâwt lutuk titháwltu a nih ka beisei," a ti a; multipurpose centre thar chu khawtlang ta a nih avangin, a hmangtu apiangte'n a enkawlnaah mawhphurhna an nei tih hria se a duh thu a sawi.

Bialtu MLA Lalsawta pawhin thu sawiin, Dawrpui veng mipui thawhhona zarah Dawrpui Multipurpose Centre hawn a ni ta chu lawmawm a tih thu a sawi a, "Dawrpui hi Aizawl District Civil Hospital awmna a nih avangin damdawi-ina thi an awm chángin ruang buaipuiin veng ṭhalaite an che chhuak a, an thawk nasa ṭhin hle a ni. Ruang dah lailâwkna tur he centre-ah siam a ni leh zel hi chhiat tâwkte tan leh tlawmngai pawlte tan a ṭangkai hle dawn a ni," a ti.

Dawrpui Multipurpose Centre sak nan hian chweng nuai 880.96 sen niin, September 5, 2018-ah sak zawh a ni a; chhawng nga niin, parking, morgue & prayer hall, information hall, library, choka, health sub-centre, committee room pahnih, store room, green room, etc. a awm a ni.